Komori
اتحاد القمر
Union des Comores
Udzima wa Komori
Flag of the Comoros.svg Seal of the Comoros.svg
Standardo di Komori Blazono di Komori
Nacionala himno:
Udzima wa ya Masiwa
LocationComoros.svg
Urbi:
Chefurbo: Moroni
· Habitanti: 53.420 (2003)
Precipua urbo: Moroni
Lingui:
Oficala lingui: araba, Franca, shikomoriana
Guvernerio:
Tipo: Republiko
· Prezidanto: Azali Assoumani
Surfaco: (178ma granda)
· Totala: 2 235 km²
· Aquo: neglijebla %
Habitanti: (159ma granda)
· Totala: 850 688 (2018)
· Denseso di habitantaro: 457 hab./km²
Plusa informi:
Valuto: Franko de Komori
Veho-latero: dextre
ISO: KM
COM
174
Reto-domeno: .km*
Precipua religio: islamo, 98%


Komori esas lando konsistanta ek tri insuli che Indiana oceano, este de Afrika. Lua chef-urbo Moroni jacas sur la maxim granda insulo, Granda Komoro. La nomo dil arkipelago asociesas kun la Lun-adoro. Lua nomo devenas del araba Jebel-el-Komr, tradukuro dil originala Greka nomo ore seleniae, signifikante 'lun-monti'. La vorto komr signifikas "luno" en l'Araba.

Bazala fakti pri Komori.

HistorioRedaktar

 
Dhow (bateleto kun Araba origino) proxim Komori.
 Precipua artiklo: Historio di Komori

La maxim anciena habitanti di Komori esis Afrikani ed Austroneziani, qui arivis en l'insuli ante la yaro 600 pos Kristo, epoko di la maxim anciena arkeologiala restaji konocata en Komori, an l'insulo Nzwani (Anjouan). Populi Swahili arivis en l'arkipelago dum l'unesma yarmilo.

Segun legendo, en 632 Mtswa-Mwindza sendesis del insuli a Meka, ma kande ilu arivis ibe, la profeto Muhamad ja mortabis. Malgre to, ilu retroiris al insuli por docar Islamo a la habitantaro. Tamen, fakte esis l'Arabi komercisti qui adportis Islamo al insuli. L'insuli gradope divenis importanta komercala centro por Persiani ed Arabi, qui komercis koralio, ambro, oro de Zimbabwe, tortuga skalii e sklavi ibe. La portui di Kilwa, Sofala e Mombasa en Kenia esis la precipua fonti di vari komercita che l'insuli.

L'Araba koloniigo en Komori kreskis kande Zanzibar okupesis dal Omanani. Diversa rivala sultanii koloniigis l'insuli dum la 16ma e 17ma yarcenti.

 
Sultano Said Ali bin Said Omar.

Portugalani vizitis l'arkipelago unesmafoye en 1503. En 1514, Portugalana navigisto Afonso de Albuquerque spoliis l'insuli. Dum la 16ma yarcento, l'insuli furnisis provizuri por Portugalana kolonieti en Mozambik. En 1793, Madagaskarani komencis marodar l'insuli por prenar sklavi, e pose kontrolis diversa regioni.

Francia komenicis okupar l'arkipelago en 1841. En 1886 rejino Salima Machimba pozis l'insulo Mohéli sub Franca protekto. Samayare, sultano Said Ali bin Said Omar, de Granda Komoro ank aceptis Franca protekto, malgre ilu duris esar la suvereno til 1909. En 1912 la kolonio e la protektorato Franca en l'insuli abolisesis, e Franca generala-guberniestro en Madagaskar komencis administrar ol pos 1914.

Ye la 6ma di julio 1975 Komoriana parlamento deklaris unilatere la nedependo di la lando. La sequanta 30 yari esis epoko di politikala nestabileso. Ahmed Abdallah Abderemane divenis l'unesma prezidanto di Komori Pos la nedependantesko, ma ye la 3ma di agosto sam yaro eventis stato-stroko, e Said Mohamed Jaffar asumis povo. Proxim ta epoko, la habitantaro di Mayotte votis du foyi, en 1974 per 63.8% ek la voti, ed en 1976 per 99.4% ek la voti, kontre divenar nedependanta de Francia.

PolitikoRedaktar

 
Moroni, chef-urbo di Komori e sideyo di la guvernerio.

La nuna konstituco di Komori ratifikesis per plebicito ye la 23ma di decembro 2001. Segun ol, la lando esas federala prezidantala republiko. La prezidanto di la republiko essas la chefo di stato e la chefo di guvernerio, e la prezidanteso alternesas singla 4 yari inter reprezenteri de omna 3 insuli. La nuna prezidanto esas Azali Assoumani, qua asumis povo ye la 26ma di mayo 2016.

La parlamento havas unika chambro, l'Assemblée, kun 33 membri, di qui 18 elektesas direte dal populo e 15 elekesas da la membri de l'asemblaji lokala de la insuli. Omna membri del parlamento servas dum 5 yari.

Lua legala sistemo mixas Islamala lego, Franca legala sistemo (Napoleonala kodexo) e lokala tradicioni. La Supra korto di Komori funcionas quale konstitucala korto, e kontrolas la prezidantal elekti.

GeografioRedaktar

 
Mapo di Komori.
 
Saloza lago proxim l'urbo Bangoi-Kouni, en Granda Komoro.

Kun 2 235 km² Komori esas un ek la min granda landi del mondo. Granda Komoro kun 1 148 km² esas lua precipua insulo. Moroni, la chef-urbo di la lando, jacas en ol.

L'insuli originis de volkanal aktiveso. La volkano Karthala, kun 2 361 metri di altitudo, esas la maxim alta punto de la lando. Ol eruptis lastafoye en 2006. Dum erupto en 2005, cirkume 40 mil habitanti diplasesis, e la lago qua existis interne ol desaparis.

Lua klimato esas tropikala, havanta varma e humida sezono, rezultanta de la monsono qua eventas de novembro til aprilo, e sika sezono dum l'altra monati. La mezavalora yarala temperaturo varias de 23°C til 28 °C an la litoro. La mezavalora yarala pluvo-quanto esas 2.000 mm. En kelka regioni l'aquo esas skarsa, e ne existas importanta fluvii o riveri.

EkonomioRedaktar

 Precipua artiklo: Ekonomio di Komori

DemografioRedaktar

Kun min kam 1 milion habitanti e kun mezavalora denseso di 275 habitanti per km², Komori esas un ek la maxim dense populizita landi del mondo. En 2001, 34% de la habitantaro vivis en urbi, ma ta procento certe kreskos, pro l'ekmigro de la rurala regioni.

Cirkume la duimo dil habitantaro evas 15 yari o min. La maxim granda urbo di la lando esas Moroni. Altra importanta urbi esas Mutsamudu e Mitsamiouli.

Preske 98% de lua habitantaro esas Mohamedani. Mikra minoritato, konsistanta precipue ek enmigranti de Francia, esas Katoliki.

KulturoRedaktar

La linguo Shikomoriana, proxim de Swahilia esas la maxim uzata linguo en Komori. Cirkume 30% de lua vorti havas Araba origino.

La muziko dil arkipelago influesis da Franca, estal-Afrikana e Madagaskarana muziki. Tamen, la jenro taarab, de Zanzibar, restas la maxim importanta muzikala influo. La muzikala stilo Sega de Maurico ank esas populara.

ReferiRedaktar


Nedependanta stati en Afrika
Aljeria | Angola | Benin | Botswana | Burkina Faso | Burundi | Centrafrika | Chad | Demokratial Republiko Kongo | Djibuti | Egiptia | Equatorala Guinea | Eritrea | Etiopia | Gabon | Gambia | Ghana | Guinea | Guinea Bisau | Ivora Rivo | Kabo Verda | Kamerun | Kenia | Komori | Kongo | Lesotho | Liberia | Libia | Madagaskar | Malawi | Mali | Maroko | Maurico | Mauritania | Mozambik | Namibia | Nigeria | Nijer | Ruanda | Sao Tome e Principe | Senegal | Sierra Leone | Seycheli | Somalia | Sudafrika | Sudan | Sud-Sudan | Swazilando | Tanzania | Tunizia | Togo | Uganda | Zambia | Zimbabwe
Nesuverena teritorii
Ceuta | Kanarii | Madeira | Melilla | Westala Sahara | Mayotte | Reunion | Sokotra
Nedependo ne agnoskata
Somalilando | Puntlando