Historio di Germania

La regiono di nuna Germania habitesis de adminime 600 mil yari ante nun, komence da tale nomizita Homo heidelbergensis, de qua trovesis mandibulo en 1907. Interne karbono-mineyo en Schöningen trovesis la maxim anciena chaso-armi konocata. En 1856 unesmafoye deskovresis en Nordrheno-Vestfalia osti de tale nomizita Homo neanderthalensis.

L'unesma grupi di moderna farmisti qui habitis la regiono originis de Anatolia e migris a la regiono dum Neolitiko, de 10 mil til 8 mil yari ante nun. Dum la fino di Bronz-epoko e komenco di Fer-epoko (1300 aK til cirkume 500 aK) diversa kulturi, judikata kom Kelta populi, habitis la regiono. Cirkume 700 aK, Germana populi komencis arivar en la regiono e gradope remplasis Kelti.

Ye la duimo dil 1ma yarcento aK, Iulius Caesar komencis konstruktar ponti sur Rheno, dum ilua kampanio en Gallia. Pos multa dii, ilu ne trovis Germani, qui retretabis doplande. Iulius Caesar nomizis Germania la nekonquestita estala rivo di Rheno. La konquestita westala rivo dividesis en Belgica e Gallia Celtica. En la yaro 9 Germana, tribui vinkis Romani en la batalio di la foresto Teutoburg, e preventis l'invado di la regiono da Romani. Dum la 3ma yarcento aparis multa tribui Germana, exemple Alamani, Franki, Bavari, Saxoni e plura altra. Kristanismo introduktesis en la regiono dum la regno da Konstantinus la 1ma (306 til 337). Dum la fino dil 4ma yarcento, Huni invadis Europa, e kontrolis la regiono til la morto di Dengizich, filiulo di Attila, en 469.

Dum Mezepoko, parti ek la regiono apartenis direte a Santa Romana imperio, kontre ke en altra parti existis diversa mikra princii. Santa Romana imperio perdis kelka povo en 1648, pos finir la milito di Triadek yari, e diversa nedependanta rejolandi e princolandi aparis, exemple Prusia, Bavaria e Saxonia. Dum la 17ma e 18ma yarcenti, diversa princii Germana adoptis absolutismo, simile Franca modelo. Prusia, rejio protestanta, developis su multe dum la regno di Friedrich la 2ma, e lu povis konfrontar la povo di katolika Austria. Tamen, nek Austria nek Prusia povis vinkar Napoléon Bonaparte kande ilu invadis teritorii di la du.

Pos la krulo di Santa Romana imperio e la vinkeso di Napoléon, la frontieri di Europana landi ridesegnesis. Germania ne unionesis, ma kreesis tale nomizita Kunfederuro Germana, konsistanta ek 39 suverena stati.

Ye la 18ma di januaro 1871, en la spegul-galerio di la Palaco di Versailles, la unigo di Germania esis proklamata. Princi di la Germana stati, ecepte Austria-Hungaria, asemblis e proklamis ke Wilhelm la 1ma di Germania esas imperiestro di nova stato, qua remplasis la Germana Federuro, kreita da la Kongreso di Wien en 1815. La unigo di 1871 sequis la dissolvo di la Santa Romana Imperio en 1806, e kreskanta Germana nacionalismo dum la 19ma yarcento. Germana imperio partoprenis en la divido di Afrika dum la fino di la 19ma yarcento e recevis la kolonii di Tanganyika, Togo, Kamerun e Sud-West-Afrika, nun Namibia. Ol anke recevis la teritorio di Nova-Guinea en Oceania.

kurta kronologio

1914 til 1918 Unesma mondomilito. Germania perdis la milito.
1919 til 1933 La Republiko di Weimar. Germania divenis parlamentala demokratio.
1933 La diktatoreso di Nationalsocialisti kun ka diktatoro Adolf Hitler komencas.
1939 til 1945 Duesma mondomilito. Germania perdis la milito ed okupesis per Britania, Francia, Sovietia ed USA
1949 Divido di Germania en West-Germania ed Est-Germania

Precipua artiklo: Est-Germania

Precipua artiklo: West-Germania

Ye 3ma di oktobro 1990, la Federala Republiko di West-Germania esis ri-unigata kun Est-Germania. Pos la falo di la Berlin-muro ye 28ma di novembro 1989, elektado eventis en Est-Germania ye 18ma di marto 1990; la vinkanto di la elekto esis la Allianz für Deutschland, koaliso qua deziris rapida ri-unigo kun West-Germania. Diskutadi sequis, e kontrato por establisar uniono divenis valida ye 1ma di julio. La ri-unigita lando esas egardata kom plu granda versiono di la Federala Republiko, ne kom sucedanta stato.

Ye la 10ma di marto 1994 Berlin divenis chef-urbo di unionita Germania, en substituco a Bonn. Pos riunigo, Germania asumis plu importanta roli en Europana Uniono ed en NATO. La lando sendis trupi por sekurar la paco en Balkani ed en Afganistan. Ta partopreno en exterala misioni esas kontroversa, nam Germana armeo, segun lua legi, servas por presorga defendo.

Extera ligili

Historio di Europa