Olimpiala Ludi en London, 1948

L'Olimpiala Ludi en London, 1948, od oficale la 14ma Olimpiala Ludi, esis internaciona plursporta konkurso qua eventis en 1948 en London, Unionita Rejio. Duesmafoye London gastigis l'Olimpiala Ludi, qui esis l'unesma Ludi pos la Duesma mondomilito.

Afisho pri l'Olimpiala Ludi en London, 1948.

La Ludi komencis ye la 29ma di julio e finis ye la 14ma di agosto 1948. Partoprenis 4.104 atleti (3.714 viri e 390 mulieri) de 59 landi e teritorii. Esis 136 eventi de 17 sporti.

Germania e Japonia ne permisesis sendar atleti a la Ludi. Italia, qua revokabis Benito Mussolini de la povo en 1943, recevis permiso partoprenar. Sovietia invitesis ma refuzis sendar atleti.

Li esis l'unesma Ludi qui eventis pos la morto di Pierre de Coubertin en 1937.

Selekto dil urbo

L'Olimpiala standardo.

En junio 1939 l'Internaciona Olimpiala Komitato selektis l'eventeyo por la Ludi di 1944. Pro la duesma mondomilito la ludi ne eventis. Pos ke finis la milito, London restis kanditata por la sequanta Ludi. Unionita Rejio preske donis l'eventeyo ad Usa pro manko di kapitali pos la milito, ma rejulo George la 6ma di Unionita Rejio dicis ke la Ludi reparus Unionita Rejio pos la milito.

La Ludi surnomizesis "la Ludi di Severeso", pro manko di kapitali destinata a sportala substrukturi. Nutrivi, petrolo e materiaro por konstrukto porcionigesis. Konstruktar olimpiala vilajo reputesis kustoza, do l'atleti sejornis en existanta lojeyi konstruktita por militala uzado. La stadio Wembley adaptesis por recevar la konkursi pri atletismo. Tamen, l'atleti recevis augmentita porcioni di nutrivi: 5 467 kalorii omnadie, vice la mezvalora 2 600 kalorii omnadie por la komuna civitani.

Kelka fakti

Arjentinian atleto Delfo Cabrera vinkas la maratono en 1948.

• L'inauguro-ceremonio eventis en la stadio Wembley ye la 29ma di julio 1948.
• 14 landi e teritorii partoprenis unesmafoye: Britaniana Guiana (nun Guyana), Burma (nun Myanmar), Ceylon (nun Sri-Lanka), Iran, Irak, Jamaika, Korea, Libano, Pakistan, Porto-Riko, Singapur, Siria, Trinidad e Tobago e Venezuela.
• Chekoslovakiana Emil Zátopek ganis ora medalio por 10.000-metra kurado, ed arjenta por 5.000-metra.
• Károly Takács, membro de Hungariana esquado championa pri sporta pafado en 1938, perdis lua dextra manuo pos l'explozo di grenado. En 1948 il pafis per lua sinistra manuo e ganis ora medalio por 25-metra rapida pafado per pistolo. Carlos Enrique Díaz Sáenz Valiente ganis l'arjenta medalio por la sama konkurso.
• Duesmafoye basketbalo ludesis kom olimpiala sporto. L'Usana esquado ganis la ora medalio, la Franca ganis l'arjenta e laBraziliana ganis la bronza.
• Nederlandan atletino Fanny Blankers-Koen ganis quar ora medalii por kurado: 100-metra, 200-metra, 80-metra kun obstakli, e 4x100-metra relayo.
• Willie Grut de Suedia ganis ora medalio por moderna pentatlo.

Medalii ganita

Landi partopreninta l'Olimpiala Ludi, 1948. Blue, landi qui partoprenis unesmafoye.

Spektanti dum l'inauguro-ceremonio di l'Olimpiala Ludi en 1948.

Yen la listo di landi qui recevis adminime 1 medalio en London, 1948.

#	Lando	Ora	Arjenta	Bronza	Entote
1	Usa	38	27	19	84
2	Suedia	16	11	17	44
3	Francia	10	6	13	29
4	Hungaria	10	5	12	27
5	Italia	8	11	8	27
6	Finlando	8	7	5	20
7	Turkia	6	4	2	12
8	Chekoslovakia	6	2	3	11
9	Suisia	5	10	5	20
10	Dania	5	7	8	20
11	Nederlando	5	2	9	16
12	Unionita Rejio	3	14	6	23
13	Arjentinia	3	3	1	7
14	Australia	2	6	5	13
15	Belgia	2	2	3	7
16	Egiptia	2	2	1	5
17	Mexikia	2	1	2	5
18	Sudafrika	2	1	1	4
19	Norvegia	1	3	3	7
20	Jamaika	1	2	0	3
21	Austria	1	0	3	4
22	India	1	0	0	1
22	Peru	1	0	0	1
24	Yugoslavia	0	2	0	2
25	Kanada	0	1	2	3
26	Portugal	0	1	1	2
26	Uruguay	0	1	1	2
28	Ceylon	0	1	0	1
28	Kuba	0	1	0	1
28	Hispania	0	1	0	1
28	Trinidad e Tobago	0	1	0	1
32	Sud-Korea	0	0	2	2
32	Panama	0	0	2	2
34	Brazilia	0	0	1	1
34	Iran	0	0	1	1
34	Polonia	0	0	1	1
34	Porto-Riko	0	0	1	1
Totali		138	135	138	411