Apertar la precipua menuo
Myanmar
Myanmar long form.png
Pyidaunzu Thanmăda Myăma Nainngandaw
Flag of Myanmar.svg State seal of Myanmar.svg
Standardo di Myanmar Blazono di Myanmar
Nacionala himno:
Kaba Ma Kyei
Myanmar in its region.svg
Urbi:
Chefurbo: Naypyidaw
· Habitanti: 925 000 (2009)
Precipua urbo: Rangoon
Lingui:
Oficala lingui: Burmana
Guvernerio:
Tipo: republiko
· Prezidanto: Win Myint
Surfaco: (40ma granda)
· Aquo: 3,06 %
Habitanti: (24ma granda)
· Totala: 53 582 855[1] (2019)
Plusa informi:
Valuto: kyat
Veho-latero: dextre, sinistre
ISO: MM
MMR
104
Reto-domeno: .mm*
Precipua religio: Budismo
Oficala retosituo: https://www.myanmar.gov.mm/en/web/guest


Myanmar, anke konocata kom Burma, esas lando jacanta en Azia. L'oficala nomo di la lando esas Republiko dil uniono di Myanmar (Burmane Pyidaunzu Thanmăda Myăma Nainngandaw. Lu havas kom vicini Populala Republiko di Chinia nord-este, Laos este, Tailando sud-este, Bangladesh weste, ed India nord-weste. Sud-weste jacas la Bayo di Bengala, e sude jacas la Maro di Andaman. Myanmar esas la duesma maxim granda lando di sud-estal Azia.

HistorioRedaktar

 
Urbi-stati dil populo Pyu.
 Precipua artiklo: Historio di Myanmar

La lando anke konocesas kom Burma, quo havas longa historio. Homi ja habitis la regiono cirkume 11.000 yari ante nun, ma l'unesma konocata civilizuro esis la populi Pyu. Le Pyu habitis Burma cirkume l'1ma yarcento aK, ed establisis diversa rejii. Dum ta periodo, Burma esis parto di terala komercala voyo inter India e Chinia. Ne eventis militi inter le Pyu.

Dum la 6ma yarcento, la rejio Mon Dvaravati extensis lua frontieri vers la regiono Tanintharyi. Kun la submiso dil imperio Khmer di Angkor dum la 11ma yarcento, la populo Mon diplasis plu weste a la nuna Myanmar. Le Mon adoptis Indiana kulturo e budismo kom religio.

Dum la fino dil 18ma yarcento, lora rejulo Bodawpaya decidis expansar weste lua imperio. Ilu konquestis Arakan en 1784, anexis Manipur en 1813 e kaptis Assam de 1817 til 1819. Lua sucedinto, rejulo Bagyidaw, probis supresar revolti stimulita dal Britaniani en Manipur ed Assam. La konflikti kun Britaniani rezultis e l'unesma Angla-Burmana milito (1824 til 1826). La maxim kustoza milito en la historio di Britanian India[2] rezultis en vinko por Unionita Rejio.

Unionita Rejio militis altra du foyi kontre Burma, de 1852 til 1853 e de 1885 til 1886. L'administrado Britaniana adportis a Burma multa sociala, ekonomiala, kulturala ed administrala modifiki.

Pos la kapitulaco di Mandalay, Britaniani anexis Burma ye la 1ma di januaro 1886. Multa Indiani arivis dum kolonial epoko kom civila servinti, soldati, laboristi por la konstruktado di edifici, komercisti e, kune la komuneso di mestici Angla-Burmani, dominacis komercala e civila vivo di la teritorio. Rangoon divenis chef-urbo di la kolonio ed importanta portuo inter Kalkuta e Singapur.

Ye la 1ma di aprilo 1937 Britaniani separis la kolonio di Burma de India. En 1940, ante ke Japonian imperio eniris la duesma mondomilito, Aung San formacis l'Armeo por Nedependantesko di Burma en Japonia.

Burma devastesis dum la duesma mondomilito. En marto 1942, poka monati pos Japonian atako kontre Pearl Harbour, Britanian administrado krulis e Japoniani eniris Yangon. La Federiti kreis specala trupi nomizita Chindits por kombatar Japoniani. Entote, Japoniani perdis 150 mil soldati en Burma dum la milito, ma dum lua okupado cirkume 170 mil til 250 mil civili perisis. Pos la milito, Aung San negociis pri la nedependantesko di la lando, qua divenis nedependanta republiko ye la 4ma di januaro 1948.

PolitikoRedaktar

 
Prezidanto Htin Kyaw
 
La parlamento di Myanmar.

Til 2011 Myanmar esis militarala diktatoreso. Ye la 18ma di septembro 1988 eventis stato-stroko e la konstituco di 1974 abolisesis. Antee, ol esis socialista stato. Ye la 10ma di mayo 2008 eventis plebicito pri modifiki en la konstituco, por permisar elekti en 2010. La modifiki aprobesis, ed ye la 30ma di mayo 2011 Thein Sein asumis povo kom elektita prezidanto. Nova elekti eventis kin yari pose, en 2015, e Htin Kyaw, l'unesma civilo qua guvernis Myanmar, elektesis. Ilu asumis povo ye la 30ma di marto 2016.

Aung San Suu Kyi esas internacione konocata defensero di la homala yuri. El ganis la Nobel-premio pri paco en 1991 e, kun la vinko di Htin Kyaw, el divenis chef-konsilero di stato di Myanmar.

La nuna konstituco di Myanmar, la triesma Pos la nedependantesko, adoptesis en 2008. Ol establisas parlamentala guvernerio por la lando. La legifala povo konsistas ek du chambri: la supra chambro esas la Domo di la Nacionalesi (Amyotha Hluttaw), kun 224 membri, di qui 168 elektesas direte dal populo e 56 indikesas dal Komandanto di la Trupi di Defenso. L'infra chambro esas l'Asemblitaro dil Populo, havanta 440 membri, di qui 110 esas militisti. Omna civitani evante 18 yari o pluse darfas votar.

GeografioRedaktar

 
Topografiala mapo di Myanmar.
 
La lago Boga.

Jacanta inter la latitudi 9º e 29ºN e la longitudi 92º e 102ºE, Myanmar havas entote 678 500 km². En februaro 2011 la lando subdividesis en 14 stati e regioni.

Norde, la monti Hengduan formacas naturala frontiero kun Populala Republiko di Chinia. La monto Hkakabo Razi, kun 5 881 metri di altitudo, esas la maxim alta monto di la lando. Multa montari, exemple Rakhine Yoma, Bago Yoma, la monti Shan e la monti Tenasserim trairas la lando norde til sude, ed iras til Himalaya.

La monti dividas Myanmar en tri fluviala sistemi: Irrawaddy, Salween, e Sittaung. La precipua fluvio di la lando esas Irrawaddy, longa de 2 170 km. La fluvio Salween, longa de 2.815 km, naskas en Tibet ed debushas an la maro di Andaman, e partale formacas naturala frontiero kun Tailando. La maxim multa habitanti di Myanmar vivas che la valo dil Irrawaddy.

La klimati di Myanmar varias de subtropikala humida (Cwb) en nordo til tropikalo di savano centre e sude de la lando. Westo de la lando la klimato influesas da monsono.

EkonomioRedaktar

 Precipua artiklo: Ekonomio di Myanmar

Myanmar esas un ek la maxim povra landi de Sud-estal Azia, subisanta multa yardeki di ekonomiala stagno, mala jerado e politikal eskarteso. La manko di edukita laboro-povo impedas l'ekonomiala kresko, malgre ke recenta reformi duktita dal nova guvernerio kun exterlanda helpo aspiras modifikar ta situo.

Myanmar esas la 2ma maxim granda produktero di opiumo de la mondo. Malgre proskriptita depos 2002, lua plantacerii reprezentas 25% de tota produktado mondala.

Depos 1992, la guvernerio probas stimular l'eniro di turisti. Tamen, nur 270 000 personi vizitis la lando en 2006.

DemografioRedaktar

 
Grupo di Budista monaki pregas en la pagodo Shwedagon.
 
Pueri en templo di Yangon.

Segun la demografiala kontado di 2014, Myanmar havis 51 419 420 habitanti.[3] To ne inkluzas 1 206 353 personi qui, segun kalkuli neoficala, habitas la stati Rakhine, Kachin e Kayin.[4] La personi qui ne esis en la lando dum la kontado ne kalkulesis. Pro to, cirkume 600 mil Burmani qui habitas legale en Tailando e milioni plusa homi qui habitas ibe nelegale ne kontesis. Burmani reprezentas 80% de la laboro-povo extranjera de Tailando.[5]

La maxim multa habitanti (68%) apartenas al etnio Bamar. Le Shan esas 10% de la habitantaro, le Kayin esas 7%, le Rakhine esas 4%, e Chiniani esas cirkume 3% de la habitantaro. La quanto di filii diminutis de 4,7 per singla muliero en 1983 til 2,4 per muliero en 2001, malgre existar nula oficala politiko pri kontrolo di naskado.[6]

L'oficala linguo di la lando esas Burmana, qua relatas la lingui Tibetana e Chiniana.

La religio kun maxima nombro di adepti esas Budismo: 87,9% de la habitantaro. Kristani esas 6,2%, Mohamedani esas 4,3%, tribuala religii praktikesas da 0,8%, Hindui esas 0,5%, e 0,2% praktikas altra religii. Nur 0,1% afirmis praktikar nula religio.

La maxim populoza urbo esas Yangon. Altra importanta urbi esas Mandalay, chef-urbo Naypyidaw, e Mawlamyine.

KulturoRedaktar

 
Dansisti dum la Festivalo dil Aquo, en Yangon.
 
Burmanana kantistini en Naypyidaw.

Existas diversa nativa kulturi en Myanmar, tamen la dominacanta esas la kulturi Budhista e Bamar, de la populo Burmana. La kulturo Bamar influesis da vicina landi, nome lua linguo, koquarto, muziko, danso e teatro. Pri vestaro, omna homi, inkluzite viri, weris lokala jupo nomizita longyi o lungi. Altralateri, en la urbi, yuna viri preferas pantaloni.

La koquarto Burmanana influesis dal Indiana, Chiniana e Tailandana koquarti, ed anke da lokala koquarti. La tipala disho Burmanana konsistas ek karno preparata kun kerio, supo, vaporagata rizo e fermentala sauco de konservata fisho, ensemble kun legumi.

La danso povas dividesar en quar tipi: folklorala, dramatala, dansi de la vilaji, e dansi por invokar spiriti (nat), singla havanta sua propra karakteristiki. Yodaya signifikas Tailando en Burmana linguo, e la danso yodaya esis l'unika danso permisita por amuzar rejala familii. La danso nat exekutesas por dankar gardera spiriti, ante ula importanta evento, exemple publika inauguro.

La muziko di Myanmar havas similesi kun la muziki de vicina landi. Ordinare ol esas melodioza kun harmonio propra, ed uzas mezuri 4/4, 2/4 od 8/16. La populo Mon ank influis la muziko Burmana. Tamen, l'ortodoxa Budhismo Theravada reprochas muziko kom dekadanta.

Futbalo esas la maxim populara sporto di Myanmar. Lokala lukti Lethwei, Bando, Banshay e Pongyi ank esas populara.

ReferiRedaktar

  1. Myamnar population (2019). Worldometers. URL vidita ye la 21ma di aprilo 2019.
  2. Thant Myint-U (2006). The River of Lost Footsteps--Histories of Burma. Farrar, Straus and Giroux. p. 113. ISBN 978-0-374-16342-6, 0-374-16342-1
  3. Provisional results of the 2014 census of Myanmar: The surprise that wasn't - (2015). Asian Population Studies.
  4. (2015). Myanmar's first census in more than 30 years: A radical revision of the official population count. Population & Societies.
  5. (8ma di junio 2006) Thailand: The Plight of Burmese Migrant Workers. Amnesty International. URL vidita ye la 13ma di julio 2006.
  6. Demographic changes in Myanmar since 1983: An examination of official data - (2013). Population and Development Review.