Japonia
日本国
Nippon-koku o Nihon-koku
Flag of Japan.svg Imperial Seal of Japan.svg
Standardo di Japonia Blazono di Japonia
Nacionala himno:
Kimi Ga Yo
Japan-location-cia.png
Urbi:
Chefurbo: Tokyo
· Habitanti: 12 570 000 habitanti (2006)
Precipua urbo: Tokyo
Lingui:
Oficala lingui: Japoniana
Guvernerio:
Tipo: Konstitucala monarkio
· Imperiestro: Naruhito
· Chefministro: Yoshihide Suga
Surfaco: (61ma granda)
· Totala: 377 873 km²
· Aquo: 0,8 %
Habitanti: (10ma granda)
· Totala: 126 440 000[1] (2018)
· Denseso di habitantaro: 334 hab./km²
Plusa informi:
Valuto: Yen
Veho-latero: sinistre
ISO: JP
JPN
392
Reto-domeno: .jp*
Precipua religio: Shintoismo (69,0%)

Budismo (66,7%)


Japonia esas lando ed arkipelago kun plu kam 6 000 insuli ed insuleti en estal Azia, che Pacifiko.

HistorioRedaktar

 Precipua artiklo: Historio di Japonia

La maxim anciena homala restaji trovita en Japonia evas de Paleolitiko, cirkume 30 mil yari aK. Pose, cirkume 14.000 yari ante Kristo, la chasera-kolektera kulturo Jōmon vivis ibe, de Mezolitiko til Neolitiko, e developis rudimenta agrokultivo e konstruktis mi-subtera domi. La kulturo Jōmon esis l'ancestri ambe de la populo Ainu e de de la populo Yamato.[2][3] Argila vazi de ta epoko esas la maxim anciena exempleri pri terakotajo de la mondo.

Dum la 16ma yarcento, Portugalana komercisti arivis en lando. En 1549 misionisto Santa Franciskus Xavier arivis en Japonia ed introduktis kristanismo en Kagoshima. En 1612 Tokugawa Ieyasu interdiktis kristanismo.

En 1707 Monto Fujiyama eruptis. En 1854 Usana oficiro Matthew Perry forcis Japonia a signatar la kontrato di Kanagawa, qua permisis komerco kun Ocidento.

Dum la Meiji-epoko (1868) Japonia rapide developis lua industrio. En 1904 komencis Rusia-Japonia milito, qua duris til 1905 kun Japoniana vinko, e l'okupeso di Taiwan e Korea. Meiji-ero finis en 1912 kun la morto dil imperiestro.

Japonia militis kontre Germania dum l'Unesma mondomilito, por expansar lua influo e teritoriala ganaji. En 1931 ol okupis Mandjuria. Kun l'internaciona kondamno a l'invado, Japonia abandonis Ligo di la nacioni du yari pose. En 1936 lando firmis antikomunista pakto kun Germania ed, ye la 7ma di decembro 1941 ol atakis Pearl Harbour, Usana bazo en Havayi. Kom rezulto, Usa eniris en Duesma mondomilito kontre Japonia, Italia e Germania. Pos subisar du ataki per atomobombi, Japonia kapitulacis senkondicione, ye la 15ma di agosto 1945. Granda parto de lua substrukturo destruktesis dum la milito.

En 1947 Japonia adopitis pacifista konstituco, kun emfazo en demokratiala liberesi. En 1956, la lando membreskis l'Unionita Nacioni.

PolitikoRedaktar

Segun la konstituco qua aprobesis ye la 3ma di mayo 1947 Japonia esas parlamentala monarkio. Lua imperiestro havas poka povo, nur ceremoniala. Depos la 1ma di mayo 2019, lu esas Naruhito.

La parlamento havas du chambri. La basa chambro esas la Domo di Reprezentanti, qua havas 480 membri qui elektesas dal populo omna 4 yari o kande la chambro dissolvesas. La supra chambro esas la Konsilantaro (equivalanta a Senato), qua havas 242 membri qui elektesas dal populo por 6 yari.

Historiale, la legala sistemo di Japonia recevis influi de Chinia, note dum l'ero Edo. Tamen, pos la 19ma yarcento ol recevis influi de Europana legala sistemi, note de Germania. Exemple, la fundamenti di la legaro adoptita en Japonia la yaro 1896 esis la Bürgerliches Gesetzbuch Germana. Ta legaro, kun modifiki pos la duesma mondomilito, duras uzesar.

GeografioRedaktar

 
Japonia.
 
Autunala peizajo proxim monto Kōya.

Japonia esas arkipelago kun 6 852 insuli ed insuleti,[4] e l'extenso di lua teritorio superiras 3.000 kilometri, irante de la maro di Okhotsk til la maro di Estal Chinia.[5] La maxim granda insuli di la lando esas Honshu, Hokkaido, Kyushu, Shikoku ed Okinawa. L'insuli Ryukyu, qui inkluzas Okinawa, formacas kateno sude de Kyushu. La tota surfaco di Japonia esas 377 925,24 km², e la lando havas la 6ma maxim longa marala rivo de la mondo: 29 751 kilometri.

Du triimi ek la surfaco di la lando konsistas ek montari, kun multa volkani. La maxim alta monto di la lando esas Fujiyama, dormanta volkano kun 3 776 metri di altitudo an lua somito. Entote, 73% ek la surfaco de la lando kovresas per monti, foresti o regioni neuzebla por agrokultivo. Konseque, l'arei habitebla havas alta denseso di habitantaro. Cirkume 0,5% de la sulo di la lando konquestesis de la maro. Multa projeti de la 20ma e 21ma yarcenti inkluzas la kreado di artifical insuli, exemple l'insulo ube jacas l'Internaciona Aeroportuo Kansai.

Che Hokkaido, norde de la lando, la klimato esas humida kontinentala kun longa vintri, e someri varianta de varma til milda. Centre de la lando (Honshu) la klimato esas temperema. Che la westa litoro (maro di Japonia), nord-westala venti adportas forta nivosturmi dum la vintro. Sude de la lando, la klimato esas subtropikala.

EkonomioRedaktar

 Precipua artiklo: Ekonomio di Japonia

De 1960 til 1980 Japoniana ekonomio kreskis mezavalore 10% omnayare, fakto nomizita "Japoniana miraklo". La kresko falis dum la yari 1990ma, fakto nomizita "la perdita yardeko".

DemografioRedaktar

 
Demografiala piramido di Japonia en 2015.
 
Le Ainu.

Segun statistiki de The World Factbook por julio 2018, Japonia havis 126 168 156 habitanti. La maxim multa (98,1%) esas Japoniani. Chiniani esas 0,5%, Koreani esas 0,4%, altri (inkluzite Filipinani, Vietnamani e Braziliani) esas 1%. Cirkume 230 mil Braziliani ekmigris a Japonia, di qui parto retroiris.[6] La minoritato Ainu habitas la nordo di Hokkaido e konsistas adminime ek cirkume 25.000 personi.

L'oficala linguo di la lando esas Japoniana.[6]. Minoritati parolas Chiniana, Koreana, Vietnamana e Portugalana, nome inter familiani.

La religio kun maxima nombro di adepti esas Shintoismo (70,4%). Budisti esas 69,8%, kristani esas 1,5%, altri esas 6,9%.[6] La maxim multa Japoniani esas ambe shintoani e budisti.

La maxim populoza urbo di la lando esas Tokyo, kun 12,3 milion habitanti. En lua metropolala regiono habitas cirkume 30 milioni. Altra importanta urbi esas Osaka, Yokohama, Nagoya, Fukuoka, Sendai e Sapporo.

KulturoRedaktar

La nuntempala kulturo di Japonia mixas influi Aziana, Europana e Nord-Amerikana. La tradicionala arti Japoniana inkluzas ceramiko, texuro, lako-mestiero, espadi e pupei, teatro-spektakli bunraku, kabuki, noh, dansi, rakugo (rakonto di historio da sigla artisto), ed altra kustumi, exemple teo-ceremonio, ikebana, lukti, kaligrafo, origami, onsen (balneyi), geisha e multa ludi. UNESKO klasifikis 22 loki en Japonia kom Mondala Heredo di la Homaro.

La muziko di Japonia esas eklektika e diversa. Multa instrumenti, exemple koto, shamisen e biwa (kord-instrumenti) e la tamburo taiko uzesas en tradicionala muziko. Pos Meiji-epoko, westala klasika e militala muziki rapide divenis populara en Japonia. Isawa Shūji studiis klasika muziko Westala che l'universitato Bridgewater State e pose en Harvard e, pos retroirar a Japonia, ilu fondis skolo pri muziko en Tokyo (Tôkyô ongaku gakkô). Yen altra importanta klasika kompozisti Japoniana: Kōsaku Yamada, Yoshinao Nakada, e Toru Takemitsu. De la yari 1930ma (ecepte dum la duesma mondomilito, kande ol judikesis kom "muziko dil enemiko"), jazo developis kom muzikala stilo en Japonia. Sadao Watanabe esas la maxim bone konocata jazo-muzikisto Japoniana. Kelka moderna jazo-grupi esas Ego-Wrappin' e Sakerock.

Cetera aferiRedaktar

ReferiRedaktar

  1. Eroro: template:cite web: Vu mustas precize definar la parametri url e title Statistics Bureau of Japan. URL vidita ye la 27ma di aprilo 2016.
  2. Hirofumi Matsumara ed Yukio Dodo (2009). Dental characteristics of Tohoku residents in Japan: implications for biological affinity with ancient Emishi. pp. 95-105
  3. Michael F. Hammer, TM Karafet, H. Park, K. Omoto, S. Harihara, M. Stoneking, S. Horai (2006). Dual origins of the Japanese: common ground for hunter-gatherer and farmer Y chromosomes. pp. 47-58
  4. Facts and Figures of Japan 2007 01: Land Foreign Press Center Japan
  5. Water Supply in Japan (Angla). Ministry of Health, Labour and Welfare.
  6. 6,0 6,1 6,2 East Asia/Southeast Asia::Japan - The World Factbook. CIA. URL vidita ye la 20ma di junio 2019.