Apertar la precipua menuo
Mongolia
Monggol ulus.svg
Монгол Улс
Mongol Uls
Flag of Mongolia.svg State emblem of Mongolia.svg
Standardo di Mongolia Blazono di Mongolia
Nacionala himno:
Bügd Nairamdakh Mongol
Mongolia in its region.svg
Urbi:
Chefurbo: Ulan Bator
· Habitanti: 942 705 (2005)
Precipua urbo: Ulan Bator
Lingui:
Oficala lingui: Mongola
Guvernerio:
Tipo: Republiko
· Prezidanto: Khaltmaagiin Battulga
· Chefministro: Ukhnaagiin Khürelsükh
Surfaco: (19ma granda)
· Totala: 1 566 000 km²
· Aquo: 0,43 %
Habitanti: (134ma granda)
· Totala: 3 081 677[1] (2016)
· Denseso di habitantaro: 1,97 hab./km²
Plusa informi:
Valuto: Tugrug
Veho-latero: dextre
ISO: MN
MNG
496
Reto-domeno: .mn*
Precipua religio: Tradicionala religii 31,2%, Ateismo 30,7%, Budismo 22,5%


Mongolia (Mongole Монгол Улс, Monggol Ulus) esas lando senlitora en nordal Azia, inter Rusia norde e Populala Republiko di Chinia sude. Lua surfaco esas aproxime equivalanta al historiala teritorio di Extera Mongolia, del epoko di la Dinastio Qing, en Chinia. La lando distas nur 37 km de la frontiero kun Kazakstan.

Bazala fakti pri Mongolia.

HistorioRedaktar

 Precipua artiklo: Historio di Mongolia
 
Pikturi en kaverni.

Homo erectus habitis Mongolia de 850.000 yari ante nun.[2] La moderna homi arivis en la regiono cirkume 40 mil yari ante num, dum la Supra Paleolitiko. La kaverno Khoit Tsenkher, che la provinco Khovd, montras mamuti, kameli ed altra animali. Pos la prehistorial epoko Mongola teritorio habitesis da nomada populi, qui delore formacis granda e povoza kunfederuri. La maxim anciena de ta populi, le Xiongnu, formacis kunfederuro sub l'imperiestro Modu Chanyu ye 209 aK. Balde li divenis granda minaco kontre la dinastio Qin, en Chinia.

Dum la fino dil 12ma yarcento, Temujin komencis unionar Mongola tribui. En 1206 Temujin recevis la krono dil unionita rejio kun la titulo Chingiz-kano. Dum la 13ma yarcento Mongolia esis la centro di Mongola imperio, la maxim vasta imperio de la historio: dum lua maxima ampleso, l'imperio kovris cirkume 33 milion km², e havis plu kam 100 milion habitanti.

 
Mongola imperio dum la 13ma yarcento kompare la nuna Mongolia.

Pos la morto di Chingiz-kano, l'imperio dividesis en 4 rejii, qui preske divenis komplete nedependanta en 1259 pos la morto di Möngke Khan. La lasta imperio, l'imperio Yuan di Mongolia, kreesis da Kublai Khan en 1271 e falis en 1368.

Dum la 17ma yarcento Mandjuriani vinkis Mongoli. Mandjuriana dominaco duris dum plu kam 200 yari.

Kande la dinastio Qing falis en Chinia en 1911, Mongolia deklaris su nedependanta. Ma Chinia nur vinkesis en 1921, pos la helpo di Sovietia. La Republiko Populala di Mongolia proklamesis en 1924, pos la morto di Bogd Khan, religiala chefo dil Mongoli. Dum la yari 1920ma preske 1/3 de Mongola maskula habitanti esis Budista monaki.

En 1928 Khorloogiin Choibalsan asumis la povo. Ilu komencis kolektivizuro di vend-brutari, destruktis budista monakeyi, e persekutis personi konsiderita "enemiki di la populo". En 1937 komencis politikala purgi simile a la Stalinana, qui produktis plu kam 30 000 morti. En 1931 l'invado di Mandjuria da Japoniani divenis minaco a Mongolia. Tamen, pos la batalio di Khalhin Gol en 1939, Sovietiani sucesis defensar Mongolia de Japonian invado.

En agosto 1945 Mongola trupi partoprenis en strategial atako kontre Japoniani en Mandjuria. Ye la 20ma di oktobro 1945 eventis referovoto en Chinia pri la nedependo di Mongolia. L'ideo pri nedependo vinkis, e Chinia aceptis agnoskar ol. Pos la kreado di la Populala Republiko di Chinia la du landi agnoskis su rispektive, ye la 6ma di oktobro 1949.

Ye la 26ma di januaro 1952 Yumjaagiin Tsedenbal asumis povo. Ilu kondamnis la personaleso-kulto a Choibalsan. Mongolia restis proxim politikale a Sovietia pos la rupturo China-Sovietiana dum la yari 1950ma. En 1980 cirkume 55 000 Sovietiana soldati restis en Mongolia. Dum lua vizito a Moskva en 1984, Tsendenbal subisis severa morbo, e rapide Mongola parlamento remplasis ilu da Jambyn Batmönkh.

Perestroika e glasnost komencita da Mihail Gorbachov en Sovietia rapide afektis Mongolia. Unesma protesti pri demokratio komencis ye la 10ma di decembro 1989 ed ye la 9ma di marto 1990 komunista guvernerio renuncis. En julio sam yaro eventis elekti, e la partisi dil opozantaro obtenis majoritato en la parlamento. En 1992 la lando adoptis nova konstituco e supresis "Populala Republiko" de lua nomo. En 1993, unesmafoye ne-komunista partisi vinkis elekto.

PolitikoRedaktar

 
Palaco dil guverno en Ulan Bator.
 
La Granda Statala Asemblitaro di Mongolia.

Mongolia esas demokratiala parlamentala republiko. La prezidanto elektesas dal populo por 4-yara periodo, ma havas precipue simbolala povo. La Parlamento (Ulsyn Ich-Hural, Granda Statala Asemblitaro, o Granda Hural) havas 76 membri qui elektesas direte dal populo por 4-yara periodo. Li elektas la chefministro, qua esas la chefo di guvernerio.

La Partiso dil Populo - de 1921 til 1990 nomizita Revolucionala Partiso dil Populo - formacis la guvernerio de 1921 til 1996 (en sistemo kun unika partiso til 1990) e de 2000 til 2004. De 2004 til 2006 ol esis parto di koalisuro kun Demokrata Partiso e kun altra du partisi, e pos 2006 ol esis la maxim granda partiso en du altra koalisuri. Malgre ke en elekto eventita ye la 28ma di julio 2012 nula partiso obtenis la majoritato, la Demokrati recevis plu multa voti kam l'altra partisi.

La judiciala povo di Mongolia havas tri instanci: l'unesma instanco konsistas ek lokala korti en omna provincala distrikti, ed en omna distrikti di Ulan Bator; la duesma instanco konsistas ek korti en la provinci ed en Ulan Bator; e fine la lasta instanco esas la Supra korto, kun sideyo en Ulan Bator. Por judiciar konstitucala temi existas separata Konstitucala korto.

La nuna konstituco adoptesis en 1992 e revizesis en 1999 ed en 2001. Ol grantas multa yuri, exemple religala libereso e expreso-libereso.

GeografioRedaktar

 
Mapo di Mongolia kun lua provinci, precipua urbi e voyi.
 
Baktriana kameli che la dezerto di Gobi.

Mongolia esas la 19ma maxim vasta lando del mondo. Granda parto di lua teritorio kovresas da stepi o per la dezerto Gobi. Foresti kovras 11.2% ek la teritorio.

La nordo e la westo di lando kovresas da montari. La maxim alta esas la montaro Altai, qua extensas nord-weste til sud-weste de la lando. L'erodata montaro Khangai ank extensas nord-weste til sud-weste, ed okupas la centro di la lando. Fine la montaro Khentii, qua iras de la frontiero kun Rusia til la nordo di Ulan Bator. La maxim alta monto di la lando esas Khüiten, kun 4 374 metri di altitudo.

La klimato esas temperema, kun moderema temperaturi dum somero e kolda vintri. La pluvozeso varias de 200 til 350 mm omnayare an la nordo, e de 100 til 200 mmm omnayare an la sudo.

EkonomioRedaktar

 Precipua artiklo: Ekonomio di Mongolia

DemografioRedaktar

 
Evoluciono demografiala di Mongolia, 1960 til 2015.

Segun statistiki del US Census Bureau por la yaro 2015, Mongolia havis 3 000 251 habitanti.[3] La maxim multa (95%%) esas etniala Mongoli (note Khalkha Mongoli, qui esas cirkume 86% de la habitantaro). La cetera 14% esas Oirati, Buriati, ed altra grupi. Turka populi (Kazaki e Tuvani) esas cirkume 4,5% de la habitantaro, e la cetera esas Rusi, Chiniani, Koreani ed Usani. Cirkume 30% de la habitantaro duras esar nomada, e vivas en tendi nomizita "yurti".

L'oficala linguo di la lando esas Mongola, parolata da 95% de la habitantaro. Kelka dialekti dil Oirati e Buriati anke parolesas. Weste de la lando, Kazaka linguo e Tuvana linguo parolesas.

La religio kun maxima nombro di adepti esas Budismo, praktikata da 53% de la habitantaro evanta 15 yari o pluse, segun la demografiala kontado di 2010. Cirkume 39% deklaris ne havar religio. Shamanismo duras influar Mongola kulturo ed esar praktikata. Cirkume 3% de la habitantaro esas Mohamedani e 2,2% esas kristani.

La maxim granda urbo esas Ulan Bator, kun plu kam 1 milioni habitanti en 2008. Altra importanta urbi esas Erdenet (plu kam 80 000 habitanti) e Darkham (cirkum 74 000 habitanti en 2008).

KulturoRedaktar

 
Tradicionala muzikisto pleas morin khuur.
 
Naadam esas la precipua somerala festivalo.

La maxim anciena verko en Mongola linguo esas "La sekreta historio dil Mongoli", skribita por la rejala familio kelkatempe dum la 13ma yarcento, pos la morto di Chingiz-kano. Granda nombro di texti skribita pos la 17ma yarcento prezervesis. La maxim anciena dramato en Mongola skribesis da Dulduityn Danzanravjaa, cirkume 1831.

La precipua nacionala festivalo esas Naadam, qua organizabas de multa yarcenti, ed eventas dum tri dii dum la somero. Ol konsistas ek konkursi pri tri tradicionala Mongola sporti: arkpafado, kavalo-konkursi, e Mongola lukto. Nune ol eventas de la 11ma til la 13ma di julio, omnayare.

Ante la 20ma yarcento, l'arto havis precipue religiala funciono ed influesis dal religio. Tradicionala muziko influesas forte de la nomadeso, de la naturo e de la tradicionala religii e Budismo. Un ek la tradicionala instrumenti de Mongolia esas morin khuur. L'unesma rock-bando esis Soyol Erdene, e fondesis dum la yari 1960ma kun influo de The Beatles. Pos la yari 1990ma altra jenri, exemple rap, techno e hip-hop, aparis.

Erste en 1930 l'unesma profesionala teatro fondesis en Ulan Bator. La cinemo aparis dum socialista epoko ed unesme uzesis por ideologiala propagando. L'unesma cinematografuri esis pri populala legendi e revolucionala heroi. Pos adopto di la demokratio, cinematografisti komencis serchar internaciona parteneri por krear granda produkturi, exemple Japoniana-Mongola filmo Genghis Khan. La filmo Ingen nulims ("Historio pri ploranta kamelo") da Byambasuren Davaa e Luigi Falorni nominesis por Oscar-premio pri maxim bona dokumentala filmo stranjera en 2005.

Tradicionala sporti en Mongolia esas arkpafado, kavalo-konkursi, e Mongola lukto. Altra sporti, exemple basketbalo, altra lukti (tae-kwon-do, judoo), pezajo-elevado, futbalo ed altri, anke divenis populara dum recenta yari. Plu multa Mongola tablotenisisti nune konkursas internacione.

ReferiRedaktar

  1. National Statistical Office of Mongolia. UBSEG.GOV.MN.
  2. (24ma di junio 2013) Хүрээлэнгийн эрдэм шинжилгээний ажлын ололт амжилт. Institute of Mongolian Archaeology. URL vidita ye la 28ma di junio 2013.
  3. U.S. Census Bureau International Data Base. Wayback.archive.org. URL vidita ye la 28ma di junio 2013.