Sarajevo
Kelk imaji pri Sarajevo.
Standardo Blazono
Lando: Bosnia e Herzegovina
Informo:
Latitudo: 43°52'N
Longitudo: 18°25'E
Altitudo: 518 m
Surfaco: 141,5 km²
Habitanti: 275 524[1] (2013)
Denseso di habitantaro: 1900 hab./km²
Horala zono: UTC+1
(UTC+2 dum la somero)
Urbestro: Abdulah Skaka (SDA)
Mapo di Sarajevo
Oficala retosituo:
www.sarajevo.ba

Sarajevo esas chef-urbo e maxim populoza urbo di Bosnia e Herzegovina. Segun la demografiala kontado di 2013, ol havis 275 524 habitanti.[1] Lua tota surfaco esas 141,5 km². Lua metropolala regiono havis 688 384 habitanti en 2013.[2]

Novi Grad ("nova urbo") e la monto Igman.

Cirkondata dal Dinarik Alpi ed alonge la rivero Miljacka, Sarajevo esas politikala, sociala e kulturala centro di Bosnia e Herzegovina, ed influas l'amuzo, jurnalaro, modo ed arti di tota la lando. Ol surnomizesis "Ierusalem Europana", nam ol esas un ek la maxim importanta urbi Europana ube existas moskeo, sinagogo, katolika kirko ed ortodoxa kirko an la sama quartero. L'urbo anke havas importanta universitati, exemple l'Universitato di Sarajevo, fondita en decembro 1949, qua nun havas plu kam 30 mil studenti. En 2018, la Skolo pri Cienco e Teknologio di Sarajevo judikesis kom la maxim importanta universitato di sud-estal Europa.

Historio redaktar

La regiono di Sarajevo habitesas adminime del neolitiko. Restaji de la nomizita "kulturo Butmir" trovesis en 1893, che la vicina urbo Ilidža. La kulturo Butmir produktis unika ceramikajo e terakotajo.

Altra anciena populo qua habitis la regiono esis l'Iliriani. Li vinkesis dal Romani komandita dal imperiestro Tiberius en la yaro 9. Pos la Romani, la regiono okupesis dal Goti, sequita dal Slavi en la 7ma yarcento.

En 1914, l'arkiduko Franz Ferdinand de Austria asasinesis en Sarajevo. To esis la pretexto por komencar l'unesma mondomilito.

Dum la duesma mondomilito, Yugoslavia invadesis dal Germani ed Italiani. Sarajevo kapitulacis ye la 15ma di aprilo 1941. Pos l'invado, la sinagogo Il Kal Grande spoliesis, brulesis e destruktesis dal Naziisti, kun kelka helpo di Bosniaki.

En 1984, lor esinte parto di Yugoslavia, eventis ibe la Vintrala Olimpiala Ludi. De De 1992 til 1996 l'urbo siejesis dum la milito di Bosnia.

Geografio redaktar

 
La fluvio Miljacka, en Sarajevo.

La reliefo di Sarajevo esas kolinoza, cirkondata da kolini e kovrata da foresti e kin monti plu alta. Ol jacas 518 metri super la marala nivelo. Lua precipua fluvio esas Miljacka.

La klimato Sarajevo esas humida kontinentala (Dfb segun la klimatala klasifikuro da Köppen) kun influo oceanala, e havas 4 sezoni klare definita. Lua proximeso de Adriatiko moderas la klimato. La mezavalora temperaturo en januaro (vintro) esas -0,5°C, dum ke la mezavalora temperaturo en julio (somero) esas 19,7°C. La maxima temperaturo enrejistrita dum lua historio esis 40.7 °C, en 1945, dum ke la minima temperaturo enrejistrita esis -26.2 °C en 1942.

La mezavalora yarala pluvo-quanto esas 928 mm, e la maxim pluvoza monato esas septembro, kun mezavalore 91 mm.

Referi redaktar

Chef-urbi di Europana landi

Amsterdam · Andorra la Vella · Athina · Bakı · Beograd  · Berlin · Bern · Bratislava · Bruxel · Budapest · București · Chișinău · Dublin · Helsinki · Kiyiv · København · Lisboa · Ljubljana · London · Luxemburg · Madrid · Minsk · Monako · Moskva · Nikosia · Oslo · Paris · Podgorica · Praha  · Reykjavík · Rīga · Roma · San-Marino · Sarajevo · Skopje  · Sofiya · Stockholm · Tallinn · Tbilisi · Tirane · Vaduz · Valletta  · Warszawa · Vatikano · Wien · Vilnius · Yerevan · Zagreb