Olimpiala Ludi en Amsterdam, 1928

L'Olimpiala Ludi en Amsterdam, 1928, od oficale la 9ma Olimpiala Ludi, esis internaciona plursporta konkurso qua eventis en 1928 en Amsterdam, Nederlando.

L'Olimpiala Flago.

La Ludi komencis ye la 28ma di julio e finis ye la 12ma di agosto 1928, kun la partopreno di 2.883 atleti (277 mulieri e 2.606 viri) de 46 landi. Esis 109 eventi de 14 sporti.

Frederik van Tuyll van Serooskerken prizentis unesmafoye la kandidateso di Amsterdam en 1912, mem ante la kreado dil Komitato Olimpiala Nederlandana. En 1916 la ludi ne eventis, pro l'unesma mondomilito. En 1919 la Nederlandana komitato decidis sustenar Antwerpen kom kandidato por la ludi en 1920, ed en 1921 Paris selektesis por la ludi en 1924.

Kelka fakti

L'Olimpiala stadio en Amsterdam, en 1928.

• L'Olimpiala Flamo acendesis unesma-foye.
• Barono Pierre de Coubertin, malada, ne povis partoprenar.
• Germania partoprenis unesma-foye pos la fino dil Unesma mondomilito.
• La parado di landi unesmafoye komencis kun Grekia e finis kun la gastiganta lando, tradiciono qua duras til nun.
• Mulieri partoprenis en atletismo unesmafoye.
• Uruguay ganis ora medalio en futbalo pos vinkar Arjentinia.
• Paavo Nurmi ganis lua unesma ora medalio, por 10 000-metra kurado.
• Johnny Weissmuller ganis du ora medalii por natado. Pose, il pleis rolo en diversa filmi kom Tarzan.
• Germana Lina Radke ganis ora-medalio por 800-metra kurado por mulieri. Quoniam mult altra konkursanti fatigesis dum la kurado, lore la prezidanto dil Olimpiala Internaciona Komitato, Henri de Baillet-Latour, decidis interruptar la 800-metra konkurso por mulieri til 1960.

Medalii ganita

Landi partopreninta en Amsterdam, 1928. Rhodezia, blue, partoprenis unesmafoye.

Inauguro-ceremonio en Amsterdam, 1928.

Yen la listo di landi qui recevis adminime 1 bronza medalio en Amsterdam en 1928.

#	Lando	Ora	Arjenta	Bronza	Entote
1	Usa	22	18	16	56
2	Germania	10	7	14	31
3	Finlando	8	8	9	25
4	Suedia	7	6	12	25
5	Italia	7	5	7	19
6	Suisia	7	4	4	15
7	Francia	6	10	5	21
8	Nederlando	6	9	4	19
9	Hungaria	4	5	0	9
10	Kanada	4	4	7	15
11	Unionita Rejio	3	10	7	20
12	Arjentinia	3	3	1	7
13	Dania	3	1	2	6
14	Chekoslovakia	2	5	2	9
15	Japonia	2	2	1	5
16	Estonia	2	1	2	5
17	Egiptia	2	1	1	4
18	Austria	2	0	1	3
19	Australia	1	2	1	4
19	Norvegia	1	2	1	4
21	Polonia	1	1	3	5
21	Yugoslavia	1	1	3	5
23	Sudafrika	1	0	2	3
24	India	1	0	0	1
24	Republiko Irlando	1	0	0	1
24	Nova-Zelando	1	0	0	1
24	Hispania	1	0	0	1
24	Uruguay	1	0	0	1
29	Belgia	0	1	2	3
30	Chili	0	1	0	1
30	Haiti	0	1	0	1
32	Filipini	0	0	1	1
32	Portugal	0	0	1	1
Totali		110	108	109	327