Apertar la precipua menuo

EtimologioRedaktar

Segun populala etimologio, la nomo "Karnavalo" venas de la Latina carno vale (adio a la karno), pro ke karno interdiktesis dum la karesmo. Altri opinionas ke carno havas la figurala signifiko di plezuro, pro ke la karesmo esas periodo di penitenco.

Karnavali en kelka regioniRedaktar

 
Karnavalo en Goa.

IndiaRedaktar

En India du regioni havas karnavalo: Goa e Kerala. En Goa ol nomizesas Intruz, probable kun origino en la Portugalana vorto Entrudo, altra nomo anciena di "karnavalo" en la Portugalana. L'urbo Loutulim havas la maxim granda karnavalo en Goa: la droli weras maskili e fantaziaji, pleas lauta muziko e dansas en stradi. Multa turisti partoprenas la festo.

En Kerala la festanti ne weras maskili, ma on pleas muziko e dansas ante cindro-merkurdio.

BraziliaRedaktar

Samba-skoli en Rio de Janeiro ed altra urbiRedaktar

 
Alegoriala veturo de samba-skolo, en Rio de Janeiro.

En Brazilia la maxim notora karnavalo eventas en Rio de Janeiro kun paradi di samba-skoli, de saturdio til mardio. La paradi eventas en Sambódromo, komplexo di permanenta edifici konstruktita por kontenar granda nombro de personi (kapaceso: plu kam 50.000 spektanti), precipue turisti. La paradi komencas ye 20:00 o 21:00 kloki e finas pos 5:00 kloki. Samba-skoli ordinare havas plu kam 2.500 partoprenanti, di qui plu kam 100 esas muzikisti. Singla samba-skolo selektas temo por prizentar en sua parado - exemple, homajo ad ula urbo, loko, persono, historiala fakto o mitologiala persono - e lua partoprenanti paradas kun fantaziaji qui reprezentas la temi selektita da singla samba-skolo. La muziko dum la paradi esas samba.

 
Rejulo Momo de la karnavalo di Florianópolis en 2005.

En Rio de Janeiro, Sao Paulo ed altra urbi, ante la komenco di karnavalo on elektas la Rei Momo ("rejulo Momo"), ordinare grazosa e simpatioza viro, "chefo" qua havas nula povo, ma funcionas kom talisman-persono. Ordinare on elektas anke la "rejino" o la "princini" dil karnavalo. Rejulo Momo esas anke simbolala alegorio pri karnavalo en altra Latin-Amerikana festi. Il simbole recevas la "klefo dil urbo" de l'urbestro e deklaras la komenco di karnavalo. En Brazilia ilu povas vizitar samba-skoli di sua urbo o donar la trofeo a samba-skolo elektita kom championo en karnavalo-konkursi.

 
Parado di samba-skolo en Sao Paulo.

La karnavalo di Rio di Janeiro influis la kreado di paradi di samba-skoli en altra grand urbi, exemple Sao Paulo, Belo Horizonte, Santos e Florianópolis. Gradope dum recent yari la samba-skoli di Sao Paulo kreskis multe, komencis atraktar plusa e plusa turisti. La granda qualeso di la imaji di la parado komencis interesar televizioni pri la transmiso dil evento, simile a lo eventinta al paradi di samba-skoli en Rio de Janeiro. L'urbo di São Paulo konstruktis sua Sambódromo, simile a Rio de Janeiro, e la reti di televiziono komencis transmisar la imaji por altra Braziliana regioni ed por l'exterlando. La karnavalo-muziki en ta paradi esas samba, e simile ad Rio de Janeiro, omnayare eventas en Sao Paulo konkurso por selektar la maxim bona samba-skolo de l'urbo.

Anke Rio de Janeiro, Sao Paulo ed altra urbi (exemple, Brasilia) havas populala karnavali en kelka stradi, e masko- e fantaziajo-bali en saloni. En l'urbo di Rio de Janeiro eventas anke travestio-balo qua divenis konocata kom Gala Gay.

Olinda e RecifeRedaktar

 
Danserini di frevo en Olinda, Pernambuco.

En Olinda e Recife la muzikala ritmo di karnavali esas frevo e maracatu. Danke la viziti di nacionala e stranjera turisti, anke lia karnavali divenis bone konocata. La koreografio di frevo uzas quaze akrobatala movadi kun salti e rotaci. La danseri uzas anke koloroza parapluvi dum sua akobatarti.

Salvador, BahiaRedaktar

 
Karnavalo di Salvador, Bahia.

En l'urbo Salvador eventas altra famoza karnavalo di Brazilia, qua atraktas multa nacionala ed exterlandala turisti. Ibe la karnavalo havas diferanta ritmi: Axé, Pagode, Samba-Reggae, Lambada (ritmo kun influi de zouk e soca) ed altri, ed ofte singlayare on kreas nova ritmo o danso qua divenas modo en la karnavalo di Salvador. La personi preferas dansar en la stradi e sequar trio elétrico, nome, granda kamioni kun enorma fono-buxi en qui kantisti, muzikisti o muzikala grupi pleas sua fanfari. Le trio elétrico ordinare paradas o stacas en specala stradi inter la quarteri Barra ed Ondina (Circuito Barra-Ondina), od en la quartero Campo Grande.

La karnavalo di Salvador esis ceno por lansar kelka artisti nun populara en tota Brazilia ed exterlando, exemple Daniela Mercury, Ivete Sangalo, Carlinhos Brown, Cláudia Leitte, e la bandi Chiclete com Banana, Olodum e Timbalada. En multa kazi ta artisti kreas sua propra trio elétrico e kantas e dansas por l'asistantaro. Kelka notora internaciona artisti, exemple David Guetta, Will.i.Am, Bob Sinclair e PSY ja vizitis la karnavalo di Salvador.[1]

Ouro Preto e São João del Rei, en Minas GeraisRedaktar

En l'anciena urbo Ouro Preto eventas la maxim tradicionala karnavalo di Minas Gerais. Partoprenanti ordinare esas studenti qui vivas en l'urbo e lore repozas pos sua studiadi. Li dansas e kantas en la historiala stradi di Ouro Preto, animata da muzikala bandi qui pleas anciena e tradicionala karnavalo-muzikaji, konocata kom "marchinhas de carnaval".

En São João del Rei, altra ancien urbo kun tradicionala karnavalo, la personi weras maskili e fantaziaji e dansas en la stradi, ed eventas paradi di lokala samba-skoli. Quankam ol ne esas tam richa e famoza kam la karnavalo en Rio de Janeiro, multa turisti prizas la tradicionala karnavali, ube on povas krear sua propra fantaziajo o maskilo o simple dansar werante ordinara vesti e spensar preske nulo por bone amuzar su.

En altra Sud-Amerikana landiRedaktar

 
Karnavalo en Gualeguaychú.

ArjentiniaRedaktar

En Gualeguaychú eventas karnavalo kun Afrikal influi e paradi kun alegoriala veturi e dansistini simila a Rio de Janeiro. En l'urbo Corrientes eventas prizentado di murgas, populala muzikala teatro kun propra muzikala jenro qua havis sua origino en Hispania.

BoliviaRedaktar

 
Diablada, en Oruro.

En l'urbo Oruro, Bolivia, eventas la Diablada, per qua on honorizas la patrono-santino dil ministi, la Vírgen de Socavon (la Virgino dil Tuneli). Plu kam 50 grupi dansas, kantas e paradas en la stradi, vestizita kom demoni, anjeli, inkao-soldati o Hispana conquistadores. En 2001, UNESCO deklaris la karnavalo di Oruro "Maestroverko de Parolala e Netushebla Homarala Patrimonio".

KolumbiaRedaktar

 
Karnavala vetur-platformo en Pasto, Kolumbia.

Quankam Hispani enduktis karnavalo en Kolumbia, la festo subisis censuro da kolonial autoritatozi en la precipua urbi, Cartagena, Bogota e Popayán. Barranquilla ed altr urbeti alonge la fluvio Magdalena prezervis karnavala tradicioni de kolonial epoko til nun. La karnavalo di Bogota rinaskis erste dum la 21ma yarcento.

UruguayRedaktar

En Montevideo, Uruguay, eventas paradi di murgas, ma Uruguayana karnavalo havas anke Afrikal influi, nome bantua ed Angolana. Existas du tipi di paradi: Desfile de Carnaval (karnavalo-parado) e Desfile de Llamadas. La muziko en la Desfile de Llamadas recevas la nomo candombe. La karnavalo en Uruguay duras dum 40 dii ed esas la maxim longa karnavalo del mondo.

PeruRedaktar

L'urbo Cajamarca konsideresas la chef-urbo di Peruana karnavalo. Lokala habitanti dansas cirkum arboro ornita per rubandi, baloni, frukti, ludili, drinkajo-boteli ed altr artikli, nomizita unhsa, o yunsa.

Karnavalo en Nord-AmerikaRedaktar

 
Alegoriala veturo en New Orleans.

UsaRedaktar

La maxim konocata karnavalo di Usa eventas en New Orleans, Louisiana, e konocesas kom Mardi Gras. Ol havas Franca origino. Eventas paradi kun alegoriala veturi, e la partoprenanti dansas en la stradi. Ma la karnavalo di New Orleans ne esas l'unika e ne esas la maxim anciena de Usa: en Mobile, Alabama, karnavalo-festi komencis en 1703, t.e. 15 yari ante ke New Orleans fondesis[2]. Altra karnavali eventas en Tampa, Florida, Biloxi, Mississippi, Saint Louis, Missouri, e plusa urbi. En New York eventas karnavalo en septembro, kun Karibiana origino, dum la Dio dil Laboro en Usa.

KanadaRedaktar

 
Bonhomme Carnaval

En Toronto eventas Caribana, karnavalo kun Karibiana origino. Pro klimatala motivi ol eventas en somero, dum l'unesma semano di agosto. To posibligas al partoprenanti werar Karibiana kostumi dum la parado[3]. En Quebec eventas karnavalo dum vintro, ube konstruktesas palaco ek glacio. La "rejulo di karnavalo" en Quebec esas Bonhomme Carnaval, un simpatiinda nivo-homulo qua vivas en la Palaco di Glacio. La karnavalo di Quebec konsideresas la maxim granda vintro-karnavalo del mondo[4].

MexikiaRedaktar

 
Karnavalo di Huejotzingo.

En Mexikia la festi di karnavalo eventas en diversa urbi. Un ek la maxim anciena esas la karnavalo di Campeche, urbo en la peninsulo di Yukatan qua havas comparsas (grupi di kantisti e dansisti, simile ad Hispaniana karnavalo). En Cozumel la karnavalo celebresas de la 26ma di februaro til la 5ma di marto. En l'urbo Huejotzingo la partoprenanti uzas maskili, fantaziaji, shildi e fusili por prizentar teatrala spektaklo pri la historio dil urbo.

La karnavalo di Mazatlán, Sinaloa, nune konsideresas un ek la maxim importanta karnavali di Mexikia. On kalkulas ke dum la sundio di karnavalo la paradi atraktas cirkume 600.000 personi por la rival avenuo "Avenida del Mar". Dum la karnavalo brulesas granda pupei di paperopasto nomizita Monigotes, qui ordinare reprezentas politikisti ed altr odiinda personi. Ante lua brulado, monigotes uzesas por dekorar l'urbo.

Karnavalo en Karibiana MaroRedaktar

HaitiRedaktar

 
Maskili por Haitiana karnavalo.

La tradiciono dil karnavalo en Haiti komencis en 1804, pos la nedependo-deklaro. La karnavalo en Port-au-Prince esas un ek la maxim granda en Karibiana Maro ed en Nord-Amerika Plu kam un milion personi amasigas en lua stradi por uzar maskili e fantaziaji o nur dansar. La muzikala ritmi povas esar tradicionala Kompa Meringue, o moderna zouk, techno, hip-hop, reggae od altra stili.

Dominikana RepublikoRedaktar

 
Karnavalo en Dominikana Republiko.

Karnavalo en Dominikana Republiko eventas dum la monato di februaro quankam en kelka urbi ol povas eventar en marto,[5] dum la Santa Semano od en agosto. La kulmino dil karnavalo eventas omnayare ye la 27ma di februaro, dio di la nedependo di Dominikana Republiko. La maskili e koloroza fantaziaji uzata reprezentas figuri quale la demono Diablo Cojuelo, le Lechones, o la Robalagallina (Haitiana influo). Altra personi maskas su quale indijeni.

Trinidad e TobagoRedaktar

 
Danseri en la karnavalo di Trinidad e Tobago.

En Trinidad e Tobago la Karnavalo duras dum du dii ante la cindro-merkurdio. Ol esas un ek la maxim importanta turistal eventi di la lando. Lua muzikala ritmi esas soca e calypso e lua danso havas Afrikal influo. Personi preferas dansar e parad-irar en la stradi, e kelka ek li kovras lia korpi kun fango. Eventas l'elekto di la Monarko dil Calypso, qua recevas automobilo e pekunio kom premio. Hike, la konkursi di fantaziaji ank esas populala.

JamaikaRedaktar

Karnavalo en Jamaika kreesis en 1989, pro du eventi: la uragano Gilbert l'antea yaro (do multa turisti de Jamaika ne povis irar a Trinidad e Tobago) e l'elekti en 1989.[6] En 1990 la karnavalo di Jamaika (nomizita Bacchanal) divenis oficala. La karnavalo ne koincidas exakte kun l'epoko ante Karesmo, ma eventas de februaro til aprilo,[7] kun paradi en la stradi di Kingston. La muzikala ritmo di Jamaikana karnavalo esas soca.

BarbadosRedaktar

En Barbados karnavalo konocesas kom Crop Over[8] ("fino dil rekolto") ed esas la maxim granda festo di la lando. La tradiciono di Crop Over komencis en 1688, komence por celebrar la fino dil rekolto di sukro-kano. Nun ol havas kantado, danso e muziki pleata per perkut-instrumenti, gitari e violini. La festo komencas en junio e duras til la komenco di agosto.

Karnavalo en AfrikaRedaktar

AngolaRedaktar

Dum la yari 1960ma la precipua karnavali di Angola eventis en la portuala urbi Luanda e Lobito.[9] Eventis paradi (corsos) kun vehili dekorita kun alegorii e maskobali en dansosaloni.[9] La festi sufris dekado kun l'interna milito pos la nedependo, ma pos finar la interna milito eventis rekupero. Nune eventas karnavalo-paradi en Luanda, e la stili di dansi e muziki di la grupi povas esar semba, kabetula, kazukuta, rebita e kuduro.[10]

Karnavali en EuropaRedaktar

BelgiaRedaktar

 
Giganta maskilo pri jok-mentiero en la karnavalo di Maaseik, Belgia, en 2013.

Kelka Belga urbi, exemple Binche,[11] Heist, Aalst,[12] Eupen, Malmedy e Kelmis havas karnavalo-paradi. En Binche, la tradiciono originis dum la 14ma yarcento. La paradi eventas dum tri dii ante la karesmo. La precipua partoprenanti esas la Gilles, personi qui paradas en tradicionala kostumi dum la Grasa Mardio. La karnavali de Aalst[12] e Binche agnoskesis kom Maestroverki de Parolala e Netushebla Homaral Patrimonio.[11]

GermaniaRedaktar

 
Karnavalo en Köln.

En l'urbi Düsseldorf[13], Köln e Mainz eventas Karneval, festo konocata anke kom "la 5ma sezono" (Fünfte Jahreszeit) qua komencas omnayare ye la 11ma di novembro ye 11:11 kloko[14], e finas en cindro-merkurdio. Eventas anke paradi kun muzikisti, e multa partoprenanti weras maskili e fantaziaji e dansas en la stradi. Notora en ta karnavalo esas l'alegorii e maskili qui parodias Europana e mondala politikisti. La kulmino di Karneval en ta urbi eventas en lundio ante cindro-merkurdio, e dum Krist-nasko on suspensas la festi.

Anke en Bonn[15] eventas paradi kun veturi kovrata per alegorii e prizentado di dansi. La televiziono prizentas bali qui eventas en saloni dum ta epoko[14]. De novembro dil ta fino di la festo, Germana televizioni ordinare transmisas imaji de la klubi ube eventas la Karnevalsitzung, la festi di karnavalo.

ItaliaRedaktar

 
Veneziana maskili.

En Venezia, Italia, eventas un ek la maxim notora karnavali en Europa ed en la mondo. La maxim anciena registro pri Veniziana karnavalo evas de 1268. Ta karnavalo esas notora pro la bela maskili e fantaziaji werata dal partoprenanti. La manufakturisti di maskili (mascareri) posedis granda prestijo en Veneziana socio, e li havis lua propra 'gildo' (ensemblo di laboristi).

Anke altra Italian urbi, exemple Viareggio, Ivrea, Acireale (en Sicilia) ed altri, havas paradi ed atraktas turisti pro sua karnavali.

HispaniaRedaktar

 
Grupo di chirigota en Cádiz, Hispania.

Multa urbi sur l'insulo Tenerife, en Kanarii, havas karnavali, ma la karnavalo di Santa Cruz de Tenerife esas la maxim famoza en l'arkipelago.[16][17] La festo eventas precipue en la stradi, kun multa muziko e parado di murgas, ed eventas l'elekto di "la Rejino di Karnavalo". L'apoteoso dil karnavalo eventas dum la "grasa mardio".

Altra exempli pri urbi en Hispania kun karnavali esas Las Palmas en Gran Kanaria, Cádiz en Andaluzia (kun lua chirigotas - grupi di satirala kantisti, e comparsas - grupi di kantisti e dansisti), e Málaga (kun lua murgas e comparsas).

En multa regioni di Hispania, exemple Barcelona, eventas ceremonio nomizita Entierro de la sardina (sepulto di la sardino) por celebrar la fino dil karnavalo. Ol konsistas en parado qua eventas en Cendra Merkurdio e parodias sepulto. La ceremonio finas kun la brulo di alegorio, ofte l'imajo pri sardino.

FranciaRedaktar

La maxim notora karnavalo en Francia eventas en Nice, kun grandioza alegoriala veturi. Dum yarcenti existis en Paris tradicionala karnavalo kun paradi, ma ol obliviesis komplete de 1950 til 1993. En 2007 cirkum 40,000 personi partoprenis la parado di karnavalo en Paris, segun l'organizeri.

GrekiaRedaktar

En Grekia karnavalo konocesas kom Apokriés, qua signifikas "adio a la karno", e la maxim granda festo eventas en Patras, kun maskobali dum tri dii, de venerdio til sundio, ante la "pura lundio", qua markizas la komenco dil karesmo en Ortodoxa kristanismo ed en estala katolikismo.

PortugalRedaktar

 
Karnavalo di Sesimbra.

Notora en Portugal esas la karnavali di Ovar, Loulé, Nazaré, Madeira e Torres Vedras. Dum recenta yari la karnavalo di Sesimbra similesas Braziliana karnavalo, nome, olta di Rio de Janeiro, pro sua fantaziaji e sua muziko, samba.

ReferiRedaktar

  1. (8ma di februaro 2013) Psy, Claudia Leitte e Sabrina Sato dançam juntos em Salvador (en Portugalana). G1. URL vidita ye la 3ma di januaro 2016.
  2. "Carnival/Mobile Mardi Gras Timeline" (list of events by year), Museum of Mobile, 2001 -Tempo-lineo
  3. "The Online Guide to Toronto's Summer Carnival".
  4. History - Carnaval de Quebec www.carnaval.qc.ca
  5. Carnaval Republica Dominicana.
  6. Our History:Bacchanal Jamaica. URL vidita ye la 7ma di februaro 2016.
  7. Bacchanal Jamaica
  8. Barbados Festivals: Crop Over! (en Angla)
  9. 9,0 9,1 mwangole.blogs.sapo.ao (2009). Carnaval - Uma festa com história (en Portugalana). URL vidita ye la 18ma di marto 2013.
  10. Angola Diplomatic Mission (en Portugalana). URL vidita ye la 18ma di marto 2015.
  11. 11,0 11,1 Visit Belgium Press Release (en Angla). URL vidita ye la 18ma di marto 2015.
  12. 12,0 12,1 UNESCO Culture Sector - Intangible (en Angla). URL vidita ye la 18ma di marto 2015.
  13. Karneval in Düsseldorf (en Germana)
  14. 14,0 14,1 Tudo de Bonn:Alaaf! Carnaval em Bonn (en Portugalana).
  15. http://www.bonn.de/tourismus_kultur_sport_freizeit/karneval_in_bonn/index.html - (en Germana)
  16. http://www.carnavaltenerife.es/
  17. http://www.festacarnaval.com/carnaval-de-tenerife/