Portalo:Brazilia/Geografio

Brazilia esas la 5ma maxim granda lando dil mondo, dop Rusia, Kanada, Popul-Republiko Chinia ed Usa, e korespondas a 47% de la teritorio di Sud-Amerika.

Mapo di Brazilia kun lua precipua urbi.

En la sudo di Brazilia povas nivar en alta regioni dum vintro.

Equatoro e Tropiko di Kaprikorno trairas Braziliana teritorio. Granda parto di Braziliana teritorio jacas inter la du linei, e plu kam 600.000 km² jacas sude de Tropiko di Kaprikorno. To rezultas en diversa peizaji e klimati.

Norde de la lando, en Amazoniana regiono, existas equatorala e tropikala foresti kun equatorala klimato. De la centro di la lando til Tocantins, sude de Maranhão e Piauí e weste de Bahia, este de l'equatorala foresto, existas vejetantaro di savano e tropikala klimato kun du sezoni: 6 monati sika, 6 monati pluvoza. Este de ta regiono (en la centro di Bahia, westo di Sergipe, Alagoas, Pernambuco, Paraíba, Rio Grande do Norte, Ceará e Piauí, e nordo di Minas Gerais) existas mi-arida klimato. La pluvo-quanto esas skarsa e neregulala. Lua vejetantaro nomizesas caatinga, signifikante "sika foresto".

De la litoro di Nord-estala regiono til granda parto di Sud-estala regiono existis tropikala foresto konocita en Portugalana kom Mata Atlântica (Atlantika foresto). Ol esis l'unesma Braziliana peizajo trovita dal Portugalani, en 1500. Nun, ca regiono esas forte populizita, e lua peizajo modifikesis dal agrokultivo, dal edukado di bovaro, porki ed altra animali, e dal industrio. Nun, restas min kam 10% del originala Atlantika foresto.

En alta regioni dil sudo di Brazilia la klimato esas subtropikala kun 4 sezoni: somero de decembro til marto, autuno de fino di marto til junio, vintro de junio til septembro, e printempo de septembro til decembro. Antee, existis foresti di koniferi en kelk arei, ma nun restas nur kelka bosketi. En ca regiono povas nivar en alta monti dum vintro. Fine, en sudo ed en westo di Rio Grande do Sul existas regiono kun naturala pastureyo nomizita Pampa, kun prolonguri en Arjentinia ed Uruguay.