Sergipe

Sergipe esas stato jacanta an la Nord-estala regiono di Brazilia. Lu havas kom vicini Alagoas norde, e Bahia weste e sude. Este jacas Oceano Atlantiko.

Sergipe Chefurbo Aracaju (602 757 habitanti en 2022) Maxim granda urbo Aracaju Surfaco 21 910,35 km² Habitanti Denseso di habitantaro 2 278 308 (2022) 103,96 hab./km² Guberniestro Fábio Mitidieri (PSD, 2023 – 2026) Posto-kodexo abreviuro SE Horala zono UTC-3 TNP (yaro) R$ 38 687 milioni (2016) Reto www.se.gov.br

Bazala fakti pri Sergipe.

Historio

Mapo de 1590 pri Sergipe.

Homi ja habitis la nuna teritorio di Sergipe de cirkume 9.000 yari aK. Tri indijena etnii vivis en la regiono: Canindé, Aratu e Tupi-Guarani. L'unesma Europani qui exploris la regiono esis Franci, qui kompris ligno pau-brasil del indijeni, kambie diversa objekti.

Ye la 1ma di januaro 1590 Portugalani fondis São Cristovão, la 4ma maxim anciena urbo di Brazilia. En 1637 la regiono okupesis dal Nederlandani, qui nur ekpulsesis dal Portugalani en 1645. En 1699 Portugalani fondis l'urbeto Aracaju, apud la rivero Sergipe.

Sergipe separesis de la provinco Bahia ye la 8ma di julio 1820. Pos la nedependo di Brazilia ol divenis la "provinco di Sergipe", komence kun chef-urbo en São Cristóvão. Tamen, l'ekonomiala kresko di la provinco esis poka, ecepte dum kurta periodo pro la produktado di kotono. Nur en 17ma di marto 1855 Aracaju divenis chef-urbo di la provinco.

Kande la republiko proklamesis, Sergipe divenis stato. L'unesma konstituco dil stato promulgesis en 1892. De la 15ma til la 16ma di agosto 1942 eventis tri ataki per torpedi dal submara navo Germana U-507 kontre la Braziliana navi Baependi, Araraquara e Aníbal Benévolo. Pro l'ataki, lore prezidanto Getúlio Vargas deklaris milito kontre l'Axo Roma-Berlin-Tokio ye la 22ma di agosto sam yaro.

Geografio

Nacionala Parko Serra de Itabaiana.

Preske 85% de la teritorio dil stato jacas infre 300 metri di altitudo, e la maxim multa tereni esas plana. La maxim alta punto dil stato jacas an la montareto Serra Redonda, havanta cirkume 742 metri di altitudo.

São Francisco esas la precipua fluvio dil stato. Altra fluvii importanta esas Vaza-Barris, Sergipe, Japaratuba, Piauí e Real.

Lua klimato esas tropikala e humida an la litoro, kun mezavalora yarala pluvo-quanto di 1.600 mm, e miarida en regioni doplanda. Entote 47,26% de la teritorio dil stato inkluzesas en regiono surnomizita "poligono di la sikeso", en qua la sika sezono povas durar dum preske 1 yaro.

Ekonomio

La precipua produkturo di agrokultivo en stato esas sukrokano, di qua produktesas 1,4 milion tuni. Sergipe anke havas petrolo e naturala gaso en lua litoro.

Turismo, nome pro la plaji de lua litorala urbi, anke esas importanta fonto di revenuo. La preci dil hoteli en Aracaju ordinare esas plu chipa kam olta di altra chef-urbi di Nord-estala regiono.

Demografio

La demografiala kontado di 2022 trovis 2 278 308 habitanti en la stato. La maxim populoza urbo esas la chef-urbo Aracaju, kun 602 757 habitanti en 2022. Altra importanta urbi esas Nossa Senhora do Socorro, Lagarto ed Itabaiana.