Historio di Insuli Marshall

L'unesma habitanti di la nuna Insuli Marshall esis Mikroneziani, qui arivis dum la duesma yarmilo aK. Lia historio esas poke konocata. L'unesma Europano qua arivis en la teritorio esis Hispaniana Alonso de Salazar en 1526. Du yarcenti pose, en 1786, l'Angliana John Marshall vizitis l'insuli, qui nomizesis en homajo a Marshall.

Peskeri kun tradicionala vesti dum la 19ma yarcento.

Germanian imperio okupis l'arkipelago depos 1885 ed establisis protektorato. Li establisis komercala posti en l'insuli di Jaluit ed Ebon. Marshaliana iroij (lokala chefi) mantenis lia lokala autoritato dum Germana dominaco.

Japonia konquestis la teritorio dum la komenco di Unesma mondomilito, ed establisis lia guvernerio en l'insulo di Jaliut. En 31ma di januaro 1944 dum Duesma mondomilito, Usani okupis Kwajalein atolo. Pos vinkar Japoniani komplete en 1945 ol komencis administrar l'insuli e granda parto di Mikronezia kom Fidekomiso-Teritorio di Pacifiko.

De 1946 til 1958 Usa uzis l'arkipelago por probar atomobombi: eventis 67 explozi di atomobombi en ta epoko.

En 1979 l'insuli recevis propra guvernerio, ed en 21ma di oktobro 1986 ol divenis nedependanta de Usa. Amata Kabua, qua guvernis pos 1979, esis unesma prezidanto di lando. En 1986 lando signatis kontrato pri kompleta asocio kun Usa. Til 1999 l'insuli recevis 180 milion dolari en monetala kompenso pri l'uzo di Kwajalein atolo, plu altra 250 milion dolari por nukleara probi.