Hellmut Röhnisch
Hellmut Röhnisch (7ma di aprilo 1914 til 5ma di mayo 1996) esis Germana e Sueda Idisto.
| Hellmut Röhnisch | ||
 | ||
| Profesiono: | Atleto, jurnalisto, aferis | |
| Lando: |  Germania
| |
| Naskodato: | 1914 | |
| Nasko-loko: | Zeitz (Germania) | |
| Mortodato: | 1996 | |
| Morto-loko: | Örebro (Suedia) | |
Hellmut Röhnisch esis la filiulo di la Idisto Ewald Röhnisch, qua instruktis Ido ad il. Hellmut Röhnisch edukesis en Kassel (Germania). En 1932 ilu enkarcerigesis kun grupo de amiki di rezisto-movemento. Il sucesis eskapar de judiciala korto e pede atingis Finlando, pos trairir Polonia e Baltika landi. De Finlando il iris a Suedia (Örebro).
Hellmut Röhnisch laboris en Stockholm e Örebro kom jurnalisto. Pos ilua translojo a Örebro il divenis redaktero dil lokala jurnalo Centerbladat (Centro-folio). Hellmut Röhnisch sucesis krear en ca jurnalo specala Ido-pagino kun Idokurso e propagado por la linguo[1].
Hellmut Röhnisch esis mariajita kun la Suediana gimnastikino Margareta Röhnisch (1920/1921-1988). La paro havis un filiino Ann-Margret ed un filiulo. Hellmut Röhnisch divenis civitano di Suedia divenis aferisto e fondis fabriko por gimnastikala produkturi[2].
En 1945 il divenis l'unesma Sueda championo pri gimnastiko. Il esis judiciero e tradukero ye l'Olimpiadi e mondala championesi til 1988 en Seoul. Il esis honoruma membro di FIG (Federuro di internaciona gimnastiki). Il esis la maxim importanta fabrikisto di sporto-vesti en Suedia ed internacione. Il poslasis al Idisti la Röhnisch-Fonduro en Suedia.
Hellmut Röhnisch elektesis prezidanto dil Sueda Ido-federuro en la yaro 1975 ed esis prezidanto dil Uniono por la Linguo Internaciona Ido inter la 1ma di januaro 1988 til ilua morto ye li 5ma di mayo 1996[3].
Hellmut Röhnisch parolis adminime dek lingui [4]. En plu olda evo il sufris pro diabeto.
Hellmut Röhnisch skribis en diversa Ido-revui multa voyajo-naraci[5]. Dum sua lasta yari la centrala ideo di Hellmut Röhnisch esis ke la Europana Uniono agnoskez Ido kom helpo-linguo di ca organizuro por la komuniko inter la Europana populi[6].
Citaji
redaktarEn la yaro 1989 Hellmut Röhnisch dicis dum la Ido-konfero 1989 en Thalwill (Suisia):
|
Depos mea infanteso, me esas idisto, me sempre restis idisto, me restis idisto til mea lasta instanto.[7] | 
|
Referi
redaktar- ↑ Rylander, Axel: In memoriam Hellmut Röhnisch, en: Progreso numero 307/1996, p.3
- ↑ Anke Rylander, Axel: In memoriam Hellmut Röhnisch, en: Progreso numero 307/1996, p.3
- ↑ Videz Bol, Jacques: In memoriam Hellmut Röhnisch, en: Progreso numero 307/1996, p.2
- ↑ Anke Rylander, Axel: In memoriam Hellmut Röhnisch, en: Progreso numero 307/1996, p.4
- ↑ Videz Juste, Andreas: Hellmut Röhnisch kom skriptisto, en: Progreso numero 307/1996. p.5-6
- ↑ Videz Bol, Jacques: In memoriam Hellmut Röhnisch, en: Progreso numero 307/1996, p.2
- ↑ Videz Bol, Jacques: In memoriam Hellmut Röhnisch, en: Progreso numero 307/1996, p.2