Mauritshuis
La Mauritshuis esas arto-muzeo en Den Haag, Nederlando.
La muzeo kontenas la Rejala Galerio de Pikturi, quo konsistas ek 841 objekti, grandaparte pikturi de la Nederlandana Ora Epoko.
La kolekturi kontenas verki da Johannes Vermeer, Rembrandt van Rijn, Jan Steen, Paulus Potter, Frans Hals, Jacob van Ruisdael, Hans Holbein la Yuna ed altri. Originale, la 17ma yarcenta edifico esis la rezideyo di komto Johan Maurits di Nassau.
Ol nun proprietesas da la guvernerio di Nederlando e listizesas en la Maxim Bona 100 nederlandana heredajo-situi.
Historio
redaktarEn 1631, Johan Maurits, Princo di Nassau-Siegen, kuzo di stadtholder Frederik Hendrik, kompris tereno apud la Binnenhof e la adjacanta lageto Hofvijver en Den Haag, tatempe la politikala centro di la Nederlandana Republiko. Sur la tereno, la Mauritshuis konstruktesis kom hemo inter 1636 e 1641. La edifico desegnesis da la nederlandana arkitekti Jacob van Campen e Pieter Post. La du-etaja edifico esas strikte simetra e kontenas quar apartamenti e granda halo. Singla apartamento desegnesis kun avanchambro, chambro, armoro e vesteyo. Originale, la edifico havis kupolo, ma ol destruktesis dum fairo en 1704.
Pos la morto di Princo Johan Maurits en 1679, la domo proprietesis da la familio Maes, qui lugis la domo a la nederlandana guvernerio. En 1704, la internajo di la Mauritshuis grandaparte destruktesis da fairo. La edifico restauresis inter 1708 e 1718.
En 1774, publika arto-galerio formacesis en la nuna Galerio Princo Willem V. Ta kolekturo sizesis da Francia en 1794 e nur parte riganesis en 1808. La galerio-spaceto balde divenis tro mikra, tamen, ed en 1820, la Mauritshuis kompresis da la nederlandana stato skope konservar la Rejala Galerio de Pikturi. En 1822, la Mauritshuis apertesis a la publiko e kontenis la Rejala Galerio de Pikturi e la Rejala Galerio de Raraji. De 1875, la tota muzeo disponesis por pikturi.
La Mauritshuis privatigesis en 1995. La fonduro establisita tatempe jereskis e la edifico e la kolekturo. Ta edifico, proprietata da la stato, lokacesas da la muzeo. En 2007, la muzeo anuncis sua deziro expansar su. En 2010, la definitiva desegno prizentesis. La muzeo okupos parto de la proxima Sociëteit de Witte-edifico. La du edifici konektesos per subtera tunelo, sub la Korte Vijverberg.
La rinovigo komencis en 2012 e finis en 2014. Dum la rinovigo, cirkume 100 de la pikturi dil muzeo expozesis che la Gemeentemuseum. Cirkume 50 altra pikturi, inkluzanta Meisje met de parel, esis prestata ad expozi en Usa e Japonia. La muzeo riapertesis ye 27ma junio 2014 da Rejo Willem-Alexander.
Kolekturo
redaktarLa kolekturo de pikturi di stadtholder Willem V, Princo di Oranjo prizentesis a la nederlandana stato da lua filiulo, Rejo Willem I. Ta kolekturo formacis la bazo dil Rejala Galerio de Pikturi, c. 200 pikturi. La kolekturo nun nomesas la Rejala Pikturo-Galerio. La nuna kolekturo konsistas ek preske 800 pikturi ed enfokigas nederlandana e flandriana artisti, quala Pieter Brueghel, Paulus Potter, Peter Paul Rubens, Rembrandt van Rijn, Jacob van Ruisdael, Johannes Vermeer e Rogier van der Weyden. Esas anke verki da Hans Holbein en la kolekturo che la Mauritshuis.