Meisje met de parel
Meisje met de parel (Yunino kun perlo o Yunino kun perla oreloringo) esas oleo-pikturo dal 17ma-yarcenta nederlandana piktisto Johannes Vermeer.
Ol esas tronie ("vizajo-pikturo") di yunino kun kaptuko e perla oreloringo. La pikturo esas en la kolekturo di la Mauritshuis en Den Haag depos 1902.
Deskripto
redaktarLa pikturo esas tronie, 17ma-yarcenta nederlandana vorto por 'kapo' qua ne intencesis kom portreto. Ol montras europana yunino qua portas exotika robo, orientala turbano, e neprobable granda perla oreloringo. En 2014, nederlandana astrofizikisto Vincent Icke dubitis pri la materio dil oreloringo ed argumentis ke ol aspektas plu quale polisita stano kam perlo pro la spegulatra reflekto, piratra formo e grandeso dil oreloringo.
La verko esas oleo sur telo ed esas 44,5 cm alta e 39 cm larja. Ol signatesis "IVMeer" ma ne datizesis. On evaluas ke ol piktesis c. 1665.
Pos la maxim recenta restauro dil pikturo en 1994, la subtila koloro-skemo e l'intimeso di la regardo dil yunino vers la regardanto tre augmentis. Dum la restauro, on deskovris ke l'obskura fundo, hodie kelke makuloza, unesme intencesis da Vermeer esar profunda emalio-verda. Ta efekto produktesis per aplikar dina diafana strato de farbo, super la nunadia nigra fundo. Tamen, la du organika pigmenti dil verda farbo, indigo e reseda luteola, paleskis.
Proprieto
redaktarSegun la konsilo de Victor de Stuers, qua dum yari probis preventar ke rara verki da Vermeer vendesas ad exterlando, Arnoldus Andries des Tombe kompris la verko che auciono en Den Haag en 1881, pro nur du gulder kun kompro-premio de 30 centimi (c. €24 hodie). Tatempe, ol esis en mala stando. Des Tombe havis nula heredanti e donacis ta ed altra pikturi a la Mauritshuis en 1902.
En 2012, dum voyajanta expozo dum ke la Mauritshuis rinovigesis ed expansesis, la pikturo expozesis en Japonia che la Nacionala Muzeo di Westala Arto, Tokyo, e dum 2013-2014 en Usa, ube ol montresis che High Museum en Atlanta, de Young Museum en San Francisco ed en New York-urbo che la Frick Collection. Pose en 2014 ol expozesis en Bologna, Italia. En junio 2014, ol retrovenis a la Mauritshuis, e komunikesis ke ol ne plus livos ta muzeo future.
Pikto-tekniko
redaktarLa pikturo exploresis da ciencisti en Nederlando. La fundamento esas densa, flavatra e kompozesas ek kreto, plombo-blanka, okro e poka nigra. L'obskura fundo dil pikturo kontenas osto-nigra, reseda luteola, kreto, poka reda okro, ed indigo. La vizajo e drapiraji piktesis precipue per okri, natural ultramaro, osto-nigra, karbono-nigra plombo-blanka.
En kulturo
redaktarTracy Chevalier skribis historiala romano, titulizita Girl with a Pearl Earring (1999), rakonto pri la cirkonstanci dil kreo dil pikturo. En la romano, Johannes Vermeer amikeskas kun servantino Griet (fondita sur amiko di Chevalier, Georgia Kendall), elquan il engajas kom helpanto ed el sidas por il kom modelo dum portar la perla oreloringi di ilua spozino.
La romano inspiris filmo di 2003 e teatrajo di 2008 samnoma. En la filmo stelesas Scarlett Johansson kom Griet, la yunino kun la perla oreloringo. Johansson nominesis por diversa premii inkluzanta Golden Globe e BAFTA por "Best Actress in a Leading Role".