Hannover
Hannover Blick Neues Rathaus 01.jpg
Hannover vidita de la kupolo di lua prefekteyo.
Flagge Hanover.svg Coat of arms of Hannover.svg
Standardo Blazono
Lando: Flag of Germany.svg Germania
Stato: Infra-Saxonia
Informo:
Latitudo: 52º22' N
Longitudo: 9º44' W
Altitudo: 55 m
Surfaco: 204,14 km²
Habitanti: 538 068 (2018)
Denseso di habitantaro: 2600 hab./km²
Disto de Berlin: 286[1] km
Horala zono: UTC+1
(UTC+2 dum la somero)
Urbestro: Stefan Schostok (SPD)
Mapo:
Mapo di Hannover
Oficala retosituo:
www.hannover.de

Hannover esas la maxim populoza urbo en Germana stato Saxonia. Segun statistiki de 2018, ol havis 538 068 habitanti, esanta la 13ma maxim populoza urbo de Germania, e la 5ma maxim granda urbo ube Basa Germana dialekto parolesas, dop Hamburg, Dortmund, Essen e Bremen. Lua tota surfaco esas 204,14 km².

Altes Rathaus, Hannover

Hannover jacas ube la rivero Ihme debushas an la rivero Leime. De 1814 til 1866 ol esis chef-urbo dil rejio Hannover. Ol esas loko ube multa fervoyi e chosei intersekas. Lua aeroportuo jacas norde del urbo, ed esas la 9ma maxim granda de Germania. Lua publika universitato, Gottfried Wilhelm Leibniz Universität Hannover, fondesis en 1831 ed esas un ek la 9 maxim importanta teknologiala universitati di Germania.

HistorioRedaktar

L'unesma habitanti di la regiono posible esis populi qui habitis la regiono dum paleolitiko, quale montras restaji de cirkume 120 mil yari aK trovita proxim l'urbo. L'urbo fondesis dum Mezepoko, an l'estala rivo dil rivero Leine. Lua originala nomo, Honovere, posible signifikus "alta fluviala rivo", ma fakte to esas necerta.

 
Hannover en 1641.

En 1636, Georg, duko de Braunschweig-Calenberg, translojis lua rezideyo a Hannover. Santa Romana imperio transformis la duki de Braunschweig-Calenberg en princi elekteri, e ca transformo konfirmesis da lokala legifantaro en 1708.

De 1714 til 1837 la kroni di Unionita Rejio e di Hanover jacis sub personal uniono. Tamen, dum ta epoko, Britaniana monarki rare vizitis l'urbo. L'uniono finis en 1837, kande Victoria, heredinto de William la 4ma, divenis rejino dil Unionita Rejio, kontre ke la suvereno di Hannover mustis esar viro. Do, Ernst August, fratulo de William la 4ma, heredis la krono.

 
Hannover en 1900.

Rejio Hannover restis nedependanta til 1866, kande ol enkorpigesis da Prusia. Tamen, l'industriizo dil urbo e la kresko di la habitantaro durigis. Hannover divenis chef-urbo di la provinco samnoma. De 1879 til 1902, ol kreskis de 87 600 habitanti til 313 940 habitanti. En 1842 inauguresis l'unesma sistemo di tramveturi tirita per kavali. En 1893 l'unesma elektrala tramveturo instalesis.

En 1920, l'urbo expansesis ed enkorpigis lora urbeto Linden, e nova quarteri kreesis. Depos 1937 la granda juda habitantaro dil urbo komencis persekutesar. En 1938, 484 judi deportesis a Polonia, qua ne aceptis li. Ye la 15ma di decembro 1941, mem ante tale nomizita "konfero di Wansee", l'unesma judi deportesis a Riga.[2] Entote 2400 personi deportesis, di qui poke transvivis. Dum la milito, 7 koncentreyi konstruktesis en Hannover, ube judi enternesis. De cirkume 4800 judi qui habitis la urbo en 1938, min kam 100 restis kande Usan armeo arivis, ye la 10ma di aprilo 1945. Pos la milito, granda nombro di transvivinta judi liberigita de la vicina koncentreyo di Bergen-Belsen lojeskis en Hannover.

 
Edifici bombardita dum la 2ma mondomilito.

Hannover bombardesis multafoye dum la milito, nam ol esis importanta koncentro-punto di ferovoyi e chosei, ed anke industriala centro. Rezidala zoni anke divenis emi, e plu kam 6000 civili mortis dum la bombardi. Plu kam 90% de lua centrala quartero destruktesis da entote 88 aeral ataki. Pos la milito, la kirko Aegidienkirche ne rikonstruktesis, e divenis memorialo pri la milito. Pos ke Germania dividesis en 4 okupo-zoni, Hannover restis en Britaniana okupo-zono, e divenis parto dil stato Infra-Saxonia en 1946.

L'arkitekto Rudolf Hillebrecht komandis la rikonstrukto dil urbo pos la milito. Ilu projetis la rikonstrukto segun modelo nomizita Autogerechte Stadt, to esas "urbo amika dil automobilo". L'urbo cirkondesis per larja avenui, ligita per cirklata placi. Granda parto dil trafiko qua trairis Hannover transferesis a chosei por rapida transito. Un ek la karakterizivi di Hannover esis l'aparo di urbala zoni distanta de lua historiala centro. Pos la milito, multa habitanti demandis la rikonstrukto di edifici tale kam existis ante la milito. Pro to, l'anciena verano-rezideyo di la familio Welf che parko Herrenhäuser Garten anke rikonstruktesis.

En 1965, municipala konsilo decidis konstruktar sistemo di lejera urbala ferovoyo, qua inauguresis en 1975.

GeografioRedaktar

 
Placo Lichtenbergplatz.
 
Aeral imajo pri Hannover. Centre, Neues Rathaus.

La reliefo di Hannover esas plana, jacanta an la valo dil rivero Leine, inter la montoza regiono di Basa Saxonia e la planajo de la nordo di Germania. Sude del urbo la suli esas fertila, kontre ke norde li esas marshoza e sabloza.

La klimato dil urbo esas oceanala (Cfb segun la klimatala klasifikuro da Köppen-Geiger). La maxim kolda monato esas januaro, kun temperaturo mezavalora di 1,6°C. La maxim varma monato esas julio, kun mezavalora temperaturo di 18,4°C. La mezavalora yarala temperaturo esas 9,6°C.

La mezavalora yarala pluvo-quanto esas 661,3mm. La maxim pluvoza monato esas agosto (68,7 mm), kontre ke la maxim sika monato esas februaro (41,1 mm).

Panoramo pri Hannover.

ReferiRedaktar

  1. Distance From Hannover to Berlin. URL vidita ye la 7ma di septembro 2017.
  2. Meyer, Michael (2000). - Deutsch-jüdische Geschichte der Neuzeit. Band IV - (Munich) C.H. Beck.