Fernando de Noronha

Fernando de Noronha esas arkipelago en Atlantiko qua apartenas a Brazilia e konsistas ek 26 insuli. Ol jacas ye la latitudo 3°51' Sude e longitudo 32°25' Weste, e distas 354 km este de Braziliana litoro, 360 km de Natal e 545 km nord-este de Recife.

Plajo Sancho, en Fernando de Noronha (adcentre la imajo) kun la rokoza insuleti Dois Irmãos ("du frati").

Insuli dil arkipelago Fernando de Noronha.

Deskovrita dal Portugalani posible en 1502, l'arkipelago uzesis kom punisala kolonio de la 18ma yarcento til 1957, kande la karcero klozesis. De 1938 til 1945 l'arkipelago uzesis kom politikala karcero, e multa opozanti a la diktatoreso di Getúlio Vargas sendesis adibe. Nun l'arkipelago esas parto del stato Pernambuco. Lua precipua insulo anke nomizesas Fernando de Noronha, e havas entote 18,4 km² e 3.012 habitanti segun la demografiala kontado 2010. L'oceanala aqui vicina ol havas richa biodiverseso, kun multa speci di fishi e koralii nune protektata en la Nacionala Marala Parko di Fernando de Noronha.

Geografio

Plajo Conceição, kun Morro do Pico, la maxim alta monto del arkipelago.

Topografiala mapo di Fernando de Noronha.

L'arkipelago konsistas ek 26 insuli ed insuleti, e havas volkanal origino. La precipua insulo, anke nomizita Fernando de Noronha, okupas 91% ek la surfaco totala. L'altra insuli (Rata, Ilha do Meio, Sela Gineta, Rasa) ne havas habitanti. La nacionala parko nomizita Parque Nacional Marinho de Fernando de Noronha prezervas granda parto di lua teritorio de la homala okupado e protektas endemika speci. Proxim l'arkipelago on povas vidar delfini, sharki, tortugi qui ovifas en l'arkipelago, granda fishi e fisheti qui vivas meze la koralii.

La klimato dil insuli esas tropikala (As' segun la klimatala klasifikuro da Köppen) kun du sezoni, e mezavalora yarala temperaturo di 26°C. La pluvoza sezono iras de februaro til julio, esante aprilo la maxim pluvoza monato (290 mm). La humideso esas alta dum la yaro, e varias de 70% til 90%. Lua maxim alta monto esas Morro do Pico, kun 321 metri di altitudo. Ne existas importanta fluvii o mem fluveti permananta.

Kanoni olim uzita en la defenso dil insulo avan Palaco São Miguel.

L'arkipelago judikesas kom ecelanta loko por plunjado.

Turismo esas la precipua ekonomial agado del insulo. Granda nombro di turisti vizitas lua neta plaji kun klara aqui ube on povas vidar fishi. Por financar la konservo ambientala, singla viziteri mustas pagar "turistala taxo" kande vizitas l'arkipelago. La maro vicina al arkipelago esas "paradizo" praktikanti di plunjado - l'aquo posibligas vidado klara til 30 o mem 40 metri sub la surfaco - o surfado. L'aeroportuo dil insulo inauguresis en septembro 1942 dum la duesma mondomilito, e havas diala flugi a Recife e Natal.

Granda parto di lua habitantaro laboras en, od esas proprietanti di hoteleti o restorerii, o laboras kom guid-dukteri por turisti. Existas nur un bankeyo en Fernando de Noronha.