Shablono:Eventi/9 di novembro

Rejulo Edward

• 1841. Albert Edward, filiulo di Victoria rejino di la Unionita Rejio, naskis en la Palaco di Buckingham. En 1901, ye la morto di sua matro, il divenis rejulo Edward la 7ma. Ilua patro esis Albert, princo di Saxe-Coburg e Gotha, qua esis filiulo di Ernest 1ma duko di Saxe-Coburg e Gotha; Ernest esabis Prusiana generalo qua partoprenabis batalii kontre Napoléon la 1ma. En 1863, Albert Edward mariajesis ad Alexandra princino di Dania; el esis filiino di Christian la 9ma di Dania, ilqua esis rejo di Dania de 1863 til 1906.

• 1967. La Usana kosmosondilo Surveyor 6 atingis la surfaco di la luno. La skopo di la Surveyor-projeto esis demonstrar la praktikebleso di dolce atingar la surfaco di la luno; esis sep kosmosondili en la serii, qui lansesis de 1966 til 1968, di qui kin esis sucesoza. Surveyor 6 lansesis ye la 7ma di novembro 1967; pos arivo, ol transmisis preske 30.000 imaji ante la lunala nokto qua komencis ye la 24ma di novembro. Ol esis la unesma sondilo qua lansesis de la lunala surfaco: ye 17 novembro ol levis su til alteso 3 metri, e ri-atingis la surfaco ye 2,5 metri de la originala loko. Ol pose fotografis olua antea pedotraci por trovar mekanikala propraji di la sulo; ol prenis plusa fotografuri per qui, kun fotografuri ante la movo, stereoskopiala imaji esis obtenata.

• 1994. La ne-stabila kemiala elemento darmstatio unesmafoye kreesis, en la Instituto por Explorado di Pezoza Ioni, en Darmstadt, Germania. Olua atomala nombro esas 110, ed ol esas en grupo 10 di la periodala tabelo dil elementaro. Olua maxim stabila izotopo, darmstatio-281, havas duimo-vivo 11 sekundi. Un atomo di darmstatio-269 trovesis ye ca dio, kande plombo-208 esis bombardata per nuklei di nikelo-62. La elemento ne existas naturale e la kemiala propraji ne esas savata; esas konjektata ke olua propraji esus quale ti di altra elementi di grupo 10: nikelo, paladio e platino.