Shablono:Eventi
dum mayo
50, 100 e 200 yari ante nun …
24 di mayo 1975. Ye Kosmodromo Baikonur, la kosmonavo Soyuz 18 lansesis, portante Pyotr Klimuk e Vitaly Sevastyanov. Ili voyajis a la kosmostaciono Salyut 4, arivante ye 26 di mayo. Li durigis la laboro di la antea vizitanti a la staciono, qui departabis ye 9 di februaro per la kosmonavo Soyuz 17 pos 29 dii en la staciono. Li instalis e remplasis ciencala aparati; inter altra experimenti, li probis kultivado di planti. Li prenis multa fotografuri, inkluzante 2000 di Tero e 600 di la suno. Li restis ibe 63 dii, ye ta tempo la maxim longa periodo di homi en spaco, e komencis la retroveno a Tero ye 24 di julio.
23 di mayo 1925. En Germania, Fritz Lang komencis produktado di la filmo Metropolis. Lang anke skribis la verko, kun ilua spozino Thea von Harbou. La filmo esas frua exemplo di cienco-fiktivajo: ol deskriptas futura urbo Metropolis, qua esas guvernata da richa industriisti en alta edifici, dum ke homi di basa klaso sencese laboras sub-tere ye mashini. Ol unesmafoye videsis ye 10 di januaro 1927. La filmo laudesis pro olua vidala stilo, qua influesis da futurismo, kubismo e la skolo bauhaus; ol nuntempe esas egardata kom un de la maxim influiva filmi.
7 di mayo 1825. En Wien, la kompozisto Antonio Salieri mortis. Naskinte en 1750 en Legnago, Italia, il studiis muziko ibe ed en Venezia, ube il deskovresis da Florian Leopold Gassmann, kompozisto di operi. Kun Gassmann, Salieri arivis en Wien en 1766. Christoph Willibald Gluck divenis amiko ed konsilanto, e de 1770 il kompozis operi. De 1774 til 1792, nominita da la korto Habsburg, il esis direktanto di la Italiana opero-teatro en Wien. Il retretis de operi en 1804. Il pose kompozis korala muziko e kansoni, ed esis notenda docisto: ilua studenti inkluzis Ludwig van Beethoven, Franz Schubert e Franz Liszt.