Shablono:Eventi
dum novembro
50, 100 e 200 yari ante nun …
24 di novembro 1974. En Hadar, Etiopia, deskovresis multa fosiligita osti, 40 procent de skeleto di quaza-homino qua vivis cirkume 3,2 milion yari ante nun. La deskovrinto esis Donald Johanson, paleoantropologiisto de la Muzeo di Naturala Historio ye Cleveland, Usa. La skeleto esas de la genero Australopithecus; elua kranio esas plu mikra kam moderna homi, ma indiki montras ke elu marchis rekte, quale moderna homi. Ol nomizesis "Lucy", pro ke, pos la unesma dio di exkavado, la kansono "Lucy in the Sky with Diamonds", da The Beatles, pleesis ye la kampeyo di la expediciono.
23 di novembro 1924. La astronomo Edwin Hubble, skribante en la New York Times, anuncis ke la universo extensas plu fore kam la lakto-voyo; to diferis de la kustumala opiniono. Il observabis cielala objekti per la Hooker-teleskopo sur Monto Wilson, Usa, ye ta tempo la maxim granda en la mondo. Ula nebulosi kontenis Cepheid-varianti, utiligata da astronomi por trovar la disto di la objekti, e Hubble remarkis ke la disto esis multe tro granda por la lakto-voyo. Konstatesis ke ta nebulosi, exemple Andromeda, esas altra galaxii.
14 di novembro 1824. En privata koncerto okazione di la nasko-dio di ilua fratino Fanny, la Simfonio no. 1 da Felix Mendelssohn esis unesmafoye pleata. Il kompletigabis la verko en marto 1824, kande la kompozisto evis 15 yari. Altra verki di ilua yuneso inkluzas dek-e-tri simfonii por kordo-orkestro, skribita kande il evis 12 til 14 yari, e la okteto por kordi, skribita ye evo 16 yari. La Simfonio no. 1 unesmafoye publike pleesis en koncerto di la Gewandhausorkester di Leipzig ye 1 di februaro 1827.