Petra (Jordania)
Petra esas historial urbo en Jordania. Petra (Πέτρα) esis la Greka nomo di la chefurbo di la Nabateniani. La Nabateniani nomizis lia propra urbo Rakmu. La loko esas mondala patrimonio e jacas en valo inter kolini. Ol precipue esas konocata pro la rok-tombi hakit en la roki. Preske omna edifici qui ulafoye esis ibe, nun esas ruinaji.
La prosper-epoko dankesez erste a la komercal itinerario de 1600 kmi plu sudala Yemen a Persia, Siria e la Grek e Roman imperii, por incenso. Ultre to, Petra esis nodo por altra komercal itinerarii. La revenui del imposto da la komercisti enorme richigis la regninti di Petra e to esas videbla a la luxoz edifici e tombo-monumenti. Evaluesas ke cirkum la komenco di la yar-kontado 25.000 homi habitis Petra.
L'urbo jacas en valo qua nur esas atingebla per streta krevisi e pro to bone esas defensebla. L'urbo disponis pri injenioz aquizo-sistemo pro qua on havis sat mult aquo dum la tota yaro. La Nabateniani dum longa fristo havis propra rejio. En 106 lia imperio esis konquestita da la Roman Imperio. La komercal itinerarii chanjis, pro to Petra lente perdis olua komercala poziciono ed abandonesis en la 7ma yarcento.
La Suisiano Johann Ludwig Burckhardt, maskita kom Indiana komercisto, en 1812 rideskovris Petra por l'ocidentana mondo. L'urbo intertempe ruineskis. En 1985 UNECKO deklaris Petra kom mondala patrimonio. En 2007 l'urbo esis selektit ad un de la Nova Sep Marveli Mondala.