Maurice Glasman, Barono Glasman (n. 8 marto 1961) esas angla politikala teoriisto, profesoro, sociala komentero, e dumviva pero en la britaniana Chambro di Siniori.

Maurice Glasman

Il esas seniora lektoro pri Politikala Teorio che London Metropolitan-Universitato, e direktas olua "Faith and Citizenship"-programo.  Il esas maxim bone konocata kom la fondinto di Blue Labour, termino quan il inventis en 2009.

Glasman naskis en Walthamstow, nord-esta London, aden juda familio e kreskis en Palmers Green.  Lua patro Coleman 'Collie' Glasman, Labour-Zionisto, havis mikra ludilo-fabriko-komerco qua fine krulis; lua matro Rivie Glasman, filio di povra familio de Stamford Hill, esis dumviva Labour-suportero.  Glasman edukesis che Clapton Jewish Day School e la Jews' Free School, e studiis moderna historio che la Universitato di Cambridge. Il pleis la trumpeto, e divenis jazo-musikisto dum quar yari.  Il ganis maestro-grado pri politikala filozofio che la Universitato di York, e doktoreso che la European University Institute en Firenze per tezo pri la germana sociala-merkato-ekonomio, qua editesis en 1996 sub la titulo "Unnecessary Suffering" (Nenecesa Sufro).  Glasman citas politikala penseri de Aristoteles til la hungariana ekonomikisto e sociologo Karl Polanyi, kom importanta influi ye lua politiko.

Ye 19 novembro 2010, anuncesis ke il divenos dumviva pero.  Ante lua eleveso il laboris dum dek yari kun la grupo London Citizens e per to developis experteso pri komuneso-organizo.  Ye 4 februaro 2011, il divenis Barono Glasman di Stoke Newington e Stamford Hill en la London-distrikto Hackney, ed induktesis aden la Chambro di Siniori ye 8 marto 2011, ube il sidas sur la Labour-"benki".  Lua eleveso a la Sinioraro esis surprizo, e Glasman konfesis ke il "komplete shokesis" dal anunco.

Adherinta la Labour-Partiso en 1976, Glasman ri-okupis su pri Labour-politiko pos la morto di sua matro en 2008.  Glasman inventis la termino "Blue Labour", definita da lu kom "mikra-k"-konservema formo de socialismo qua rekomendas retroiro al pre-1945a radiki di la partiso, per kurajigar politikala partopreno da voluntala grupi, de sindikati e kirki til futbalo-klubi.  "Blue Labour" argumentas ke Labour devas embracar patriotismo e retroirar a komuneso-valori fondita sur sindikati e voluntala grupi, qui segun lu esis evidenta en frua Labour-politiko ma perdesis pos 1945 lor la kreeso di statala sociala sekureso.

En aprilo 2011, Glasman pregis la Labour-Partiso establisar dialogo kun simpatizanti dil fora-dextrana grupo English Defence League (EDL), skope "konstruktar partiso qua kurtajas komuna boneso, qua inkluzas ta homi qui suportas la EDL en nia partiso. Ne dominacanta en la partiso, ne determinanta la tono dil partiso, ma nur rikonekto kun ta homi ke ni povas reprezentar plu bona vlvo por li, pro ke ton li deziras".  En julio 2011, Glasman rekomendis ke omna enmigrado provizore haltigesez, e ke la yuro di libera movo di laboro, klefa stipulo dil Pakto di Roma, devas abrogesar, tale dividinte opiniono che Labour-komenteri.

Glasman esas suportero dil juda tradiciono, reguloze asistas sinagogo ye Shabbat, ed esas fondinta membro di Stoke Newington New Shul, kongregaciono filiala kun la Masorti-Movado.  Il pleas la trumpeto e fumas su-volvita sigareti.  Il lojas kun sua spozino e lia quar filii en apartamento super vesti-butiko en Stoke Newington en nordala London.