Lída Baarová

Lída Baarová
Profesiono:	film-aktoro
Lando:	Chekoslovakia
Naskodato:	7 di septembro 1914
Nasko-loko:	Praha, Austria-Hungaria
Mortodato:	27 di oktobro 2000, 28 di oktobro 2000
Morto-loko:	Salzburg, Austria

Lída Baarová (naskinta Ludmila Babková la 14ma di septembro 1914 en Praha til la 27ma di oktobro 2000 en Salzburg) esis Chekian aktorino ed amorantino di Joseph Goebbels.

De 1934 til 1938 el kunlaboris kun Gustav Fröhlich en multa Ufa-filmi, exemple Barkarola (1935). En 1937 el komencIs pasionoz amoro kun Joseph Goebbels dum un yaro. Pose, Goebbels-spozo Magda saveskis pri ta amorala relato ed el plendis ad Adolf Hitler. Hitler ipsa, ne esis imuna por la sorciva beleso di Baarová, ed esis la bapto-patro di la Goebbels-filii, e favoroza vers Magda, demandis a Goebbels ruptar ta relato. Ta lasta demisionis e volis divorcar de Magda, spozigis Lída Baarová, e livis Germania kun sua "Liduška", (Cheka diminutiva de Lída, sugestant amoro), a Japonia. Tamen Hitler ne aceptis la demisiono. La 15ma di oktobro 1938 Joseph Goebbels probis ocidar su. Quik Lída Baarová recevis advoko de Germana polico ke el esis persono nedezirita e do devis livar Germania.

Pos Praha, en 1941 el instalis su en Italia ube el esis la precipua aktoro en filmi quale Grazia (1943), La Fornarina (1944), Vivere ancora (1945), ed altri. Pos ke federita trupi okupas Italia, el retro-iris a Praha ube el frequentis sua olim amiko Hans Albers, altra Germana filmidolo. En aprilo 1945 Lída Baarová iris kun Hans en lua rurala domo an la rivo di lago di Starnberger en Germania. Dum ta voyajo el kaptesis da Usana militala polico, enkarcerigesis en München e pose extraditesis a Chekoslovakia.

La yari pos milito

En Chekoslovakia Lída Baarová kondamnesis a mort-puniso, quale multa publikala personaji qui laboris kun Germani dum la milito, ma el pruvis ke el laboris en Germania ante la milito e subisis nur karcerala puniso. Tale, en certa modo, elua amorala relato kun Joseph Goebbels e seque esir ekpulsata Germania, salvis elua vivo. En karcero el esis ofte vizitita da Jan Kopecký qua, quale multa altri, esas sorcita pro la magiatre bela vizajo di Lida. Jan Kopecký esis proxima parento di importanta politikisto qua aranjis la libereso por Lída. En 1949 Jan e Lida mariajesas e formacas voyala trupo ludanta marioneti ante ula dio eskapar ad Austria. De ibe, Jan Kopecký migris ad Arjentinia, lasis Lída rekuperar en la sanatorio di Suediana mediko Kurt Lundwall.

En Austria, Lída probis retrovenar, ma Anton Walbrook, qua esis persekutita dum la milito pro ilua sexuala prefero, renuncis la filmo en qua il pleus kun Lída Baarová. Por eskapar la rezultanta odio-kampanio en la jurnalaro, el iris ad Arjentinia ube el vivis en extrema povreso. El decidis retroirar ad Italia. Lua spozo restis en Arjentinia e divorcigis en 1956. Lída aparis en multa filmi, interaltre Fellini I Vitelloni (1953), ube el pleis Chinian yunino. En 1958 el translojis a Salzburg, ube el montris su sur la Veneto di teatro. En 1970 el mariajis su a Dr. Lundwall. La sama yaro Rainer Werner Fassbinder donis ad el rolo en La Bitra Lakrimi di Petra von Kant.

Pos la falo di Berlin-muro

Dum la yari 1990a, Lída Baarová riaparis sur la kulturala ceneyi di Chekia. El editis sua autobiografio e filmo, Bitra-dolca memoraji di Lída Baarová en 1995 ed en 1996 ganis premio di Festo di Art-Filmo en Trenčianske Teplice, Slovakia.

Joseph Goebbels nul-tempe obliviis Lída. Poke ante lua morto en 1945, dum ke il kombustigis sua personala paperi en la subsul armeala central-komandeyo en Berlin, la lasta kozo quan ilu jetis en la flami esis fotografuro de Lída quan il gardis, e dicis adjudante:

"El esis bela muliero."

En 1997 en publika memoraji di Lída, el dicis:

"Esas nula dubito, ke Goebbels esis interesanta personajo, charmant ed inteligenta homo e maxim bona rakontero. Vu povas esar certa ke per ilua anekdoti e joki il vivacigis multa festi."

Lída Baarová sufris de Parkinson-morbo.