Horlojo

Horlojo esas aparato qua montras kloki e minuti (e sekundi) dil diala tempo. Ol povas esar portebla en karpo o posho. Publika horlojo esas, exemple en kirko-turmo o che horlojo-butiko kom reklamo. Hemala horlojo esas exemple sur muro o tabulo. Horlojo esas uzata anke por vekigar dormanto od altre remarkigar la tempo-instanto.

Nun horo esas 12:44 (UTC).

Pri historio di horlojo

• Suno-horlojo uzesis en Babilonia c. 3000 aK.
• Sablo- o glaso-horloji uzesis en Egiptia c. 1500 aK.
• Aquo-horloji uzesis en Egiptia c. 1400 aK.
• Mekanika horloji inventesis dum Mezepoko en Europa.
• Sablo-horloji divenis generala en Europa dum 15ma yarcento. Kun li mediki mezuris pulso di veino e paroki la longeso di homilio.
• Horlojo por hemo (kun kloko-indexo) inventesis dum la yari 1360ma en Italia.
• Portebla horlojo inventesis en Germania dum la yari 1510ma.
• Kukulala horlojo expansis ad Europa de Schwarzwald, Germania, dum la yari 1730ma.
• Mikra, en karpo portebla horlojo esis konstruktata unesmafoye dum la yari 1800ma ma li divenis tre populara erste dum 20ma yarcento.
• Posho-horlojo divenas populara dum la 19ma yarcento.
• Vekiganta horlojo eniris dormo-chambro ye komenco di la 20ma yarcento. Anke tempo-mezurinta horlojo tre preciza divenas uzata en sporto-areni.
• Quarco-horlojo inventesis en 1927.
• Atomoala horlojo inventesis en 1948.
• Numerala-horlojo inventesis en 1971.