Historio di Butan

Unesma evento transskribita en Butan esis la paso di budista santo Padma Sambhava en 747. Granda parto di lua anciena historio esas nekonocata, pro fairo qua destruktis lua anciena chef-urbo, Punakha, en 1827. En la 10ma yarcento lua politikala developo subisis granda influo de la religio.

Fortreso (Dzong) en Paro, Butan, konstruktita en 1646.

Dum Britaniana dominaco en India, Britaniani probis kontrolar la teritorio di Butan, ma lua suvereni jeris por prezervar la nedependo. Kande India nedependanteskis en 1947 Britaniani abandonis lua voli pri kontrolar la rejio, ed India divenis la protektero di Butan. Nur en 1949 la du landi signatis pakto qua agnoskis Butanana nedependo.

Palaco Tashichoedzong, sideyo di Butanana guvernerio pos 1952.

En 1953, rejulo Jigme Dorji Wangchuck establisis lokala asemblajo kun 130 membri quale legifala povo, por promocar plu demokratiala formo di guvernerio. Butan divenis membro di Unionita Nacioni en 1971, ankore dum la regno di Jigme Dorji Wangchuck. Lua sucedanto, rejulo Jigme Singye Wangchuck komencis politikala reformi, e alienis parto di lua povo a la Konsilantaro di Ministri. Ilu anke permisis l'akuzo kontre la rejo, per sanciono di 2/3 de la Nacional Asemblitaro.

Dum la fino di la yari 1980a e la komenco di la yari 1990a, Butan ekpulsis granda nombro di Butanani kun Nepalana origino. Segun l'Unionita Nacioni, cirkume 107 000 vivis refujinta an l'esto di Nepal en 2008.

En 1999 la guvernerio di Butan eliminis l'interdikto di televiziono ed Interreto. Butan esis un ek la lasta landi de la mondo qui adoptis televiziono. Nova konstituco por la lando prizentesis en 2005.