Francilia

Francilia (France Île-de-France) anke konocata kom Paris-regiono esas la maxim populoza ek la 18 regioni di Francia. Segun statistiki de 2019, ol havis 12 262 544 habitanti. Lua tota surfaco esas 12 011 km², reprezentanta 2% ek la tota surfaco di metropolala Francia. Tamen, lua habitantaro reprezentas cirkume 20% de la habitantaro di la lando. Lua chef-urbo esas Paris.

Francilia Île-de-France (Franca) Regiono di Francia Paris, kun Turmo Eiffel e quartero La Défense che horizonto. Chefurbo Paris Maxim granda urbo Paris Surfaco 12 011 km² Habitanti Denseso di habitantaro 12 262 544 (2019) 1030,72 hab./km² Regionala prezidanto Valérie Pécresse] (LR, depos 2015) Horala zono UTC+1 (UTC+2 dum somero) TNP (yaro) €860 067 milioni (2023) Reto https://www.iledefrance.fr

La regiono konsistas ek 8 administrala departmenti: Paris, Essonne, Hauts-de-Seine, Seine-Saint-Denis, Seine-et-Marne, Val-de-Marne, Val-d'Oise ed Yvelines. Ol kreesis kom "distrikto di Paris-regiono" en 1961. En 1976, kande lua statuto modifikesis e divenis simila a la cetera regioni di Francia kreita en 1972, ol rinomizesis segun historiala provinco Île-de-France.

Historio

Parisii ed altra Kelta populi c. 200 aK

Francilia habitesis da Parisii, Kelta populo, dum la 3ma yarcento aK. Komercala treki trairis la regiono île de la Cité an la nuna urbo Paris. Romani konquestis la regiono en 52 aK, e komencis sua koloniigo an la sinistra rivo dil Seine. L'urbo divenis prosperoza, kun forumo, publika balneyi, templi, teatri ed amfiteatro. Dum la 3ma yarcento, Santa Denis, l'unesma episkopo di Paris, introduktis kristanismo en la regiono. Segun legendo, kande Denis refuzis renuncar ilua fido ante Romana autoritatozi, ilu senkapigesis en kolino qua divenis konocita kom Mons Martyrum (nun Montmartre). Segun la legendo, mem pos la senkapigo Denis pediris de ta kolino a la nordo dil urbo.

En 508, Klodovecho, l'unesma rejulo di Merovingiani, transformis Paris en la chef-urbo di sua rejio. Kande Frankiani komencis dominacar la tota Galia, gradope augmentis l'enmigro di Frankiani vers Paris. En 845, fortifikuro konstruktita sur Île de la Cité faliis impedar Vikinga spoliado dil urbo. Tamen, la ponti di Paris impedis enemiki navigar e helpis protektar l'urbo dum la siejo di Paris, de 885 til 887. En 987, Hugues Capet, komto de Paris e duko di le Frankiani, elektesis rejo di Franci. Dum ilua dinastio, Paris gradope kreskis e divenis la maxim povoza urbo di Francia.