Flevoland
Flevoland esas provinco di Nederlando.
Ol situesas en la centro di la lando, ube esis la olima bayo Zuiderzee.
Flevoland establisesis ye 1ma januaro 1986, kande le sudala ed estala Flevopolder kombinesis aden un provinco. Preske omna tero en la provinco riganesis de la maro erste la 1950a e 1960a yari.
La provinco havas c. 407.905 habitanti (en 2016) e konsistas ek 6 municipi. La chefurbo esas Lelystad.
Historio
redaktarPos inundo en 1916, on decidis ke la Zuiderzee, interna maro en Nederlando, inkluzesos e riganesos: la Zuiderzewerken komencis. Altra fonti indikas altra tempi e motivi, ma konkordas ke en 1932, la Afsluitdijk kompletigesis, parklozinta la maro. La Zuiderzee de lore nomizesis IJsselmeer.
La unesma parto di la nova lago qua riganesis esis la Noordoostpolder en 1939. Ta nova tero inkluzis la olima insuli Urk e Schokland ed ol inkluzesis en la provinco Overijssel. Pos to, altra parti riganesis: la sudesta parto en 1957 e la sudwesta parto en 1968.
Esis importanta chanjo en ta pos-milita projeti del antea Noordoostpolder-rigano: stretajo de aquo prezervesis alonge la olima litoro por stabiligar la aquo-tablo, e preventar ke litorala urbi perdez aceso a la maro. Tale Flevopolder divenis artificala insulo konektita a la lando per ponti. La municipi sur la tri parti votis por divenar aparta provinco, e to eventis en 1986.
Flevoland nomizesis pro Lacus Flevo, nomo registragita en Romana fonti por granda interna lago ye la suda endo* di la Zuiderzee. Dreno di le Flevoland-polder revelis multa destruktita avioni qui falis aden la IJsselmeer dum la Duesma Mondo-Milito, ed anke fosili di Pleistoceno-mamiferi.
Geografio
redaktar
Estala Flevoland (Oostelijk Flevoland od Oost-Flevoland) e Sudala Flevoland (Zuidelijk Flevoland o Zuid-Flevoland), nequale la Noordoostpolder, havas lagi inter oli e la lando: Veluwemeer e Gooimeer rispektive, tale li esas kune la maxim granda artifical insulo dil mondo. Flevoland jacas mezvalore kin metri sub la maro-nivelo.
Oli esas du polder kun unika hidrologial infrastrukturo, kun dividanta digo meze, la Knardijk, qua sekurigis un polder se l'altra inundesos. La du chefa dreno-kanali qui transiras la digo esas klozebla per inundo-pordegi. La pumpo-stacioni esas Wortman ye Lelystad-Haven, Lovink proxim Harderwijk e Colijn alonge la nordala digo apud la Ketelmeer.
Nova elemento en la desegno di Estala Flevoland esas la granda urbo Lelystad (1966), nomizita pro Cornelis Lely, ilqua pleis klefala rolo ye desegnar e realigar la Zuiderzeewerken. Altra plu normala habiteyi ja existis lore; Dronten, la chefa lokal urbo, fondesis en 1962, pose du mikra satelito-vilaji, Swifterbant e Biddinghuizen, en 1963. Ta tri inkluzesis en la nova municipo Dronten ye 1ma januaro 1972.
La Oostvaardersplassen esas peizajo de neprofunda lageti, insuleti e marshi. Originale, ta basa parto de la nova polder esis divenonta industrial areo. Spontana aparo di interesiva planti ed animali transformis l'areo aden naturo-parko, tante importanta ke nova fervoyo divertesis. La recenta diminuto di agrokultivala tero-uzo posibligos expansar naturala tero-uzo, e konektar la Oostvaardersplassen kun la Veluwe.
Municipi
redaktarFlevoland havas la sequanta municipi:
- Almere
- Dronten
- Lelystad
- Noordoostpolder
- Urk
- Zeewolde
Transporto
redaktarLa Flevopolder servesas da la fervoyo Flevolijn, de Weesp a Lelystad, e la Hanzelijn, de Lelystad vers Zwolle. La du stacioni di la provinco kun interurba servi esas Almere Centrum e Lelystad Centrum.
Lelystad Zuid esas projetata staciono inter Almere Oostvaarders e Lelystad Centrum.
Inter la urbi kun direta tren-konekti a Flevoland esas Amsterdam, Utrecht, Den Haag, Zwolle, Groningen, Leeuwarden ed Aeroportuo Schiphol.
Esas du aeroportui en la provinco: Lelystad-Aeroportuo e Noordoostpolder-Aerportuo.