Wie is de Mol?

Wie is de Mol? (en Ido: Qua esas la Talpo?) esas nederlandana televizionala realeso-konkurso, fondita sur De Mol (La Talpo), programo qua originale kreesis en 1998 da Woestijnvis e brodkastesis che VRT en Belgia.

Ol konceptesis da Michiel Devlieger, Bart de Pauw, Tom Lenaerts e Michel Vanhove, e ganis la famoza Rose d'Or premio en Montreux, Suisia, en 2000.  La formato licensesis en 40 landi cirkum la mondo.  En la unesma quar sezoni di De Mol NL partoprenis ordinara homi.  Pos la pauzo en 2004, omna partoprenanti esas nederlandana famozi.  La programo nun prizentesas da Art Rooijakkers.

La programo koncernas dek kandidati, qui mustas kompletigar taski por ganar pekunio.  Tamen, un ek la grupo-membri esas la Talpo.  La skopo dil Talpo esas faliigar la taski e minimigar la pekunio ganata.  La altra kandidati ne savas qua esas la Talpo, e bezonas desmaskar lu.

Fine di singla epizodo la kandidati probesas pri la identeso dil Talpo.  La probo kontenas 20 questioni (40 questioni en la finala probo) pri la aktivesi dil Talpo depos la antea probo, e personala questioni pri la Talpo (exemple, "Ka la Talpo esas baptita?").  Per helpo de 'verdakarti', quin li povas ganar dum la taski, la konkurencanti povas konvertar nekorekta respondi aden korekta respondi.

La persono kun la minim multa korekta respondi lore ekpulsesas de la programo.  Generale ica procedo duras til ke nur du konkurencanti e la Talpo restas.  La gananto esas la persono kun la maxim multa korekta respondi en la finala probo, e lu recevas omna pekunio ganita dum la antea fazi di la ludo.