Vlaamse Radio- en Televisieomroeporganisatie

La Vlaamse Radio- en Televisieomroeporganisatie, kurte VRT, en sua simbolo vrt, esas la nederlandana-linguala publika brodkasterio por radio e televiziono por la Flandriana Regiono e Komuneso di Belgia.  Ol esas kompanio organizata da la flandriana guvernerio e financizata per imposto-pekunio e propra revenui.  Ol havas tri televizion- e sis radio-reti, extra dijitala* ofro ed ampla interret- e portebla ofro.  La antea nomizi esis BRTN e BRT (Belgische Radio- en Televisieomroep (nederlandana-linguala programi)).

Simbolo di VRT
Chefkontoro di VRT en Bruxelles

La belga nederlandana-linguala publika brodkasterio nomesis de 1960 til 1991 BRT (Belgische Radio- en Televisieomroep).  Ol esas la sucedanto dil NIR, quo de 1930 (e de 1953 por televiziono) til 1960 responsis pri publika radio- e televizion-programi.  En 1991 la politikisti decidis ke la nomizo ne plus kovris la servaro.  La BRT difuzis nur nederlandana-linguala programi, dum ke la RTBF, la publika brodkasterio dil franca-linguala komuneso, difuzis nur programi en la franca.  Pro to la nomo tayare chanjesis a BRTN (Belgische Radio- en Televisieomroep Nederlandstalige Uitzendingen).  La nomo fine chanjesis a VRT ye 1ma januaro 1998.

Dum la periodo 1938 til 1974 VRT situesis en la Flageygebouw en Elsene, edifico desegnita dal arkitekto Joseph Diongre.  En 1974 ol translojis al Auguste Reyerslaan en Schaarbeek, ube kun RTBF nova edifico konstruktesis – edifico qua pos kelka yardeki divenis ja tro mikra, e ne plus apta por la chanjanta bezoni profesionala ed ekologiala.

Komence di 2016 anuncesis ke nova edifico konstruktesos en la sama loko en Schaarbeek.  Ol desegnesis dal arkitekto Robbrecht & Daem kunlabore kun arkitekti Dierendonckblancke e kustos 105 milion euri.  RTBF konstruktas separata edifico en la sama loko.  La konstrukto dil nova VRT-edifico komencos en 2018 e finos en 2021 maxim tarde.