Uzanto:DavidW/eventi3
dum januaro
50, 100 e 150 yari ante nun …
28 di januaro 1975. En Praha, la politikisto Antonín Novotný mortis, evante 70 yari. Il esis duktanto di la Komunista partiso di Chekoslovakia depos 1953, e prezidanto depos la morto di Antonín Zápotocký en 1957; il esis suportata da la Soviet-uniono. Dum la reformema sequanta yari en Chekoslovakia, Novotný divenis sempre min populara. Ye 5 di januaro 1968 il esis remplasata kom duktanto di la partiso da Alexander Dubček; ye 22 di marto il demisionis kom prezidanto, ed il esis remplasata da Ludvík Svoboda. En mayo il demisionis de la Centrala komitato di la Komunista partiso di Chekoslovakia. En 1971, pos la reformema periodo, il ri-elektesis a la Centrala Komitato, ma pro maladeso il havis poka politikala influo.
9 di januaro 1925. En Somerville, Nova-Jersey Usa, la aktoro Lee Van Cleef naskis. Lua genitori, Marion Van Fleete e Clarence Van Cleef, havis Nederlandana ancestri, e dum yuneso il esis farmo-laborero en Nederlandana komuneso en Nova-Jersey. Dum la duesma mondo-milito il servis en la Usana navaro. Il pose esis membro di amatora teatro-grupo. Ilua unesma rolo en filmo esis en High Noon en 1952. Il pose ofte aparis en filmi e ye TV. Il divenis plu famoza kande Sergio Leone donis ad il precipua roli en Por Kelka Plusa Dolari (1965) e La Bono, la Bruto e la Ledo (1966). En posa filmi il duris havar precipua roli.
24 di januaro 1875. En Paris, la simfoniala verko Danse macabre, da Camille Saint-Saëns, esis unesmafoye pleata. La verko deskriptas legendala evento di Halloween: Morto advokas mortinti de lia tombi, e li dansas dum ke Morto pleas sua violino, til ke hanulo krias ye jornesko. La violino en ca verko havas ajustita kordo, por plear tritono, konocata kom la diablo en muziko. Ye la unesma pleyo, la verko ne esis bone recevata pro la kadavrala aludi, ma ol nuntempe esas bone egardata.