Tu Youyou
| Tu Youyou | ||
| ||
| Profesiono: | Kemiisto | |
| Lando: |  PR Chinia
| |
| Naskodato: | 30 di decembro 1930 | |
| Nasko-loko: | Ningbo, Zhejiang, Chinia | |
Tu Youyou (chiniana: 屠呦呦; pinyin: Tú Yōuyōu; 30ma di decembro 1930) esas Chiniana farmaciala kemiisto ed edukero.
El precipue konocesas pro deskovrir artemisinino (anke konocata kom qinghaosu) e dihidroartemisinino, uzata por kuracar malario, quo salvis milioni de vivi. Elua deskovro di artemisinino ed olua relato kun malario egardesas kom signifikanta progreso en 20ma yarcenta tropikala medicino, ed importanta saneso-plubonigo por homi en tropikala developanta landi en Suda Azia, Afrika e Sud-Amerika.
Pro elua laboro, Tu recevis en 2011 la Lasker-Premio di klinikala medicino ed en 2015 la Nobel-Premio pri Fiziologio o Medicino kun William C. Campbell e Satoshi Ōmura. Tu esas la unesma Chiniana gananto di ca Nobel-premio, e la unesma muliero di Popul-Republiko Chinia qua recevis irga Nobel-premio, e la unesma Chiniano qua recevis Lasker-premio. Tu Youyou naskis, edukesis e reserchis exkluzive en Chinia.
BiografioRedaktar
Tu Youyou naskis en Ningbo, Zhejiang, Chinia ye la 30ma di decembro 1930. El asistis Xiaoshi Meza Skolo, ante transferesar a Ningbo Meza Skolo en 1948. De 1951 til 1955, el asistis la Medicinala Skolo dil Universitato di Beijing. Tu studiis che la Fako di Farmaciala Cienci, e gradizesis en 1955. Plu tarde Tu edukesis dum du e duima yari pri tradicionala chiniana medicino.
Pos gradizo, Tu laboris che l'Akademio di Tradicionala Chiniana Medicino (nun la Chiniana Akademio di Tradicionala Chiniana Medicinala Cienci) en Beijing. El promocesis a Reserchero (研究员, la maxim alta reserchero-rango en Chinia equivalanta la rango di profesoro) en 1980 kurte pos la komenco dil chiniana ekonomiala reformo en 1978. En 2001 el promocesis ad konsilero por doktorala kandidati. Nuntempe el esas Chef-Ciencisto en la Akademio.
En 2007, elua kontoro esas en olda apartament-edifco en Dongcheng-Distrikto, Beijing.
Ante 2011, Tu Youyou esis obskura dum yardeki, e deskriptesas kom "preske tote obliviita".