Shablono:Eventi/3 di oktobro

Carl Nielsen en 1931

• 1931. En København, la Dana kompozisto Carl Nielsen mortis. Il naskis en 1865 en la Dana insulo Funen. Il studiis ye la Rejala Dana Akademio di Muziko, ed en 1889 il divenis violinisto en la Rejala Dana Orkestro e restis ibe dum 16 yari. Ilua simfonio no. 1 esis unesmafoye pleata, da ta orkestro, en 1894; la sisesma e lasta simfonio aparis en 1925. Ilua kompozuri esis ne bone konocata internacione dum ilua vivo, ma li divenis plu multe audata pos la duesma mondomilito.

• 1985. Ye la Kennedy-Spaco-Centro en Florida, la unesma misiono di Spaco-paromo Atlantis komencis. Ol portis kin voyajanti, e la flugo duris til 7 di oktobro. En posa misioni di Atlantis, diversa taski esis facata; partikulare, ol portis plura importanta parti a la Internaciona Spaco-staciono (ISS). Olua 33ma e lasta flugo eventis en julio 2011; to anke esis lasta flugo di irga spaco-paromo. En ta 33 flugi, Atlantis facis entote 4848 orbiti di Tero.

• 1990. La Federala Republiko di West-Germania esis ri-unigata kun Est-Germania. Pos la falo di la Berlin-muro ye 28 di novembro 1989, elektado eventis en Est-Germania ye 18 di marto 1990; la vinkanto di la elekto esis la Allianz für Deutschland, koaliso qua deziris rapida ri-unigo kun West-Germania. Diskutadi sequis, e kontrato por establisar uniono divenis valida ye 1 di julio. La ri-unigita lando esas egardata kom plu granda versiono di la Federala Republiko, ne kom sucedanta stato.