Shablono:Eventi/30 di decembro

Skisuro di la Kristala palaco

• 1718. Karl 12ma rejulo di Suedia mortis, dum kampanio kontre Norvegia. Il regnis depos 1698; de 1700, il partoprenis plura militara kampanii. En 1716, pos ke Dania atakis Suedia, il invadis Norvegia, qua lore esis posedajo di Dania. Il siejis kelka fortresi, sen konkluziva rezultajo. En 1718, kun plu granda armeo, il duesmafoye invadis Norvegia. Dum siejo di fortreso proxim Fredrikshald, Karl ocidesis da projektilo; la invado pose abandonesis. Duesma armeo, qua intencis siejar Trondheim, retretis ye informeso di la morto di Karl; dum la retreto cirkume duimo de la 10000 soldati mortis en vintrala sturmo. To nomizesis karolinernas dödsmarsch - la morto-marcho di Karl.

• 1885. En Paris, la opero Le Cid da Jules Massenet, esis unesmafoye pleata. Jules Grévy, prezidanto di Francia, esis en la audantaro. Olua fonto esis dramato di sama nomo da Pierre Corneille, unesmafoye vidita en 1637. El Cid esis Rodrigo Diaz de Vivar, Kastiliana nobelo e militarala duktanto en la 11ma yarcento. La opero da Massenet esis multafoye pleata dum kelka yari, ma nuntempe ol esas konocata nur pro la baleto-muziko por orkestro, qua inkluzas dansi de diversa regioni di Hispania.

• 1936. La Kristala Palaco (Crystal Palace), grandega strukturo en London, destruktesis pro fairo. La edifico, de vitro-plaki e tenua koloni de gis-fero, konstruktesis en Hyde-parko por la Granda Expozo di 1851; olua longeso esis 564 m ed alteso esis 39 m. Pos la expozo, ol esis ri-konstruktata en 1854 en altra parto di London. Dum la vespero di ca dio, mikra fairo deskovresis, qua rapide extensis su; malgre la arivo di 89 fairo-vehili, la strukturo esis destruktata pos kelka hori.