Porsche
Dr. Ing. h.c. F. Porsche AG, ordinare konocata kom Porsche, esas Germana automobilo-fabrikanto specaligata en luxoza sportal automobili. Fondita la yaro 1931 en Stuttgart da Ferdinand Porsche, Adolf Rosenberger ed Anton Piëch, depos la yaro 2015 la kompanio apartenas al industriala grupo Volkswagen AG.
Historio
redaktar
En 1931, Ferdinand Porsche, Adolf Rosenberger ed Anton Piëch fondis l'entraprezo "Dr. Ing. h. c. F. Porsche GmbH", kun sideyo en Kronenstraße, 24, Stuttgart. L'entraprezo projetis automobili por altra kompanii, e l'unesma projeto, P-Wagen, facesis por la kompanio Auto Union, uzinta 16-cilindra motoro. Un ek l'unesma projeti komendita a Porsche dal Germana guvernerio esis ula "automobilo por la populo", Germane Volkswagen. La rezulto esis la modelo "Skarabeo" (Käfer). En 1939 developesis automobilo-modelo Porsche 64 o Type 54, uzinta multa peci del "Skarabeo". Porsche 64 havis sucesoza kariero en automobilala konkursi.
Dum la duesma mondomilito, la fabrikerio di Volkswagen adaptesis por produktar la militala versiono di Käfer, nomizita Kübelwagen, ed anke amfibia versiono nomizita Schwimmwagen. Porsche facis multa projeti pri pezoza tanki, tamen Germana armeo preferis la projeti Tiger I e Tiger II de la kompanio Henschel und Sohn. Ferdinand Porsche decidis modifikar lua projeto, e kreis tanko-destruktilo Panzerjäger Elefant.