Mars Polar Lander

Mars Polar Lander esis kosmosondilo di Usa.

Mars Polar Lander decensas per parafalo vers la surfaco di Marso

Ol esis lansata ye 3 di januaro 1999. La skopo esis atingar la surfaco di Marso en regiono proxim la suda polo di la planeto, e studiar la sulo e klimato. Precipue, la sondilo serchus irga glacio en la sulo.

Ye 3 di decembro 1999, kande la decenso a la surfaco di la planeto devis esar kompleta, komunikado esis perdita. La kauzo di la falio ne esas savata; un supozajo esas ke esis malfunciono di la pulsanto dum la decenso-procedo, e ke la sondilo kolizionis kun la surfaco.

Multa explorado qua esus facenda da Polar Lander esis pose facita da Phoenix, qua atingis Marso en 2008.