Historio di Santa Vincent e Grenadini
L'unesma habitanti di Santa Vincent e Grenadini esas aborijeni del etnio Karib, qui nomizis Santa Vincent Youloumain. L'insulo probable nomizesis da Cristoforo Colombo qua supozeble deskovris ol ye la 22ma di januaro (Dio di Santa Vincent) 1498 e nomizis ol pro la santo. Karib-indijeni impedis Europana koloniigo til la 18ma yarcento. Dum ta tempo, nigra sklavi, qui naufrajabis an l'insulo o fugabis de Barbados od altra kolonii e serchabis refujeyo en Santa Vincent, mixis su kun Karib-indijeni e formacis mestici konocata kom populo Garifuna, o "negra Karibi".
Francia okupis la teritorio de 1719 til 1763 e komencis kultivar kafeo, indigiero, tabako e sukrokano en granda plantacerii, kun la labor-povo da Afrikana sklavi. En 1763 Francia cedis la dominaco dil insulo ad Unionita Rejio. Tamen, Francia ri-invadis l'insulo en 1779 pos desembarkar proxim Fort Duvernette. Unionita Rejio fine riganis la teritorio definitive en 1783, kun la kontrato di Versailles.
De 1783 til 1796 eventis konflikti inter Britaniani e Garifuni komandita da Joseph Chatoyer. La revolto fine represesis en 1796, e la Britaniani deportis preske 5.000 Garifuni a l'insulo Roatán, proxim Honduras.
En 1834 sklaveso abolisesis en Santa Vincent. Fine di la yari 1840a Portugalani de Madeira komencis enmigrar vers l'insulo, e de 1861 til 1888 personi de Estal Indii komencis arivar. La laborala stando esis severa e por ex-sklavi e por enmigranti, pro la basa preci di sukro en extera merkati til la komenco di la 20ma yarcento.
Universala votado adoptesis en la kolonio en 1951. La lando nedependanteskis de Unionita Rejio ye la 27ma di oktobro 1979. Robert Milton Cato esis l'unesma chefministro pos la nedependo.
Naturala dizastri esis ofta en la historio dil arkipelago. En 1902 La volkano Soufrière eruptis, ed en aprilo di 1979 eventis nova erupto. Quankam nulu mortis, mili de personi evakuesis, ed eventis granda domaji en l'agrokultivo. En 1980 ed itere en 1987 uragani produktis granda destruktadi en la plantacerii di banano e kokoso. En 1998 e 1999 l'uragana sezono produktis vasta destruktadi en la westala litoro.
En 2009 organizesis plebicito pri modifiki en la konstituco, qua uzesas depos 1979. Tamen, la propozo aprobesis nur da 43,13% ek la voteri, multe min kam 2/3 ek la voteri bezonata por aceptar la modifikuri.