Edgar de Wahl

Edgar de Wahl
Profesiono:	docisto
Lando:	Rusia
Naskodato:	11 di agosto 1867, 11 di agosto 1867
Nasko-loko:	Olwiopol, Ukraina
Mortodato:	9 di marto 1948
Morto-loko:	Estonia

Edgar de Wahl (anke Edgar von Wahl) naskis 1867. Il studiis Volapük en 1887 ed Esperanto pos un yaro, ma abandonis ol e komencis sendependa studii en 1894. Il interesesis pri naturala solvo dil problemo e kunlaboris en 1906-1907 kun Waldemar Rosenberger, la prezidanto dil Kadem bevunetik volapuka, plu tarde la Akademi Internasional de lingu universal. En 1907, il submisis al Delegitaro por l'Adopto di Linguo Auxiliara Internaciona memorando pri la konstrukto di auxiliara linguo, sen submisar kompleta linguo.

La precipua idei en lua memorando esis:

• 1) ke nula existanta sistemo es apta;
• 2) ke l'internaciona linguo konstruktenda fondesez sur l'internaciona linguala materio;
• 3) ke tala projeto havez sua propra sistemo di vorto-formaco;
• 4) ke ol posedez gramatiko qua produktas nula nenaturala formi.

Per naturala o internaciona de Wahl intencis deskriptar ta formi ja konocata per diversa Europana lingui. Ica idei ne aceptesis dal Delegitaro e de Wahl pose elaboris sua propra sistemo til, en 1922 il publikigis sua propra linguo Occidental, en la jurnalo Kosmoglott, plu tarde Cosmoglotta. Il riasertis sua principi en konverso kun Otto Jespersen en 1935 (Novialiste nro. 6) e postulis da internaciona linguo ke ol respektez la komuna legi di etniala lingui, to es:

1. ) Ol devas esar organala, vivanta, kreskanta segun sua propra legi, aceptante nov elementi;
2. ) Por ica specala skopo ol devas fondesar sur l'internaciona formi komuna en la Europana lingui pri fonetiko, espelo ed expreso-manieri.

Fonto

• Henry Jacob, A Planned Auxiliary Language (1947)