Drenthe

Drenthe (pr. c. drenta) esas provinco di Nederlando, situita en la nordesto di ta lando.

Drenthe Chefurbo Assen Maxim granda urbo Emmen Surfaco 2 683 km² Habitanti Denseso di habitantaro 491 867 (2017) 180 hab./km² Guberniestro Jetta Klijnsma (PvdA) Horala zono UTC+1 (UTC+2 dum la somero) Reto www.drenthe.nl

Ol havas frontieri kun Overijssel sude, Frizia weste, Groningen norde, e Germania (distrikti Emsland e Bentheim, landeto Niedersachsen) este.  En januaro 2017, ol havis habitantaro 491.867 e tota areo 2683 km².

Drenthe esas habitata depos 150.000 yari.  La regiono esis dum ta tempo parto dil Episkopio di Utrecht, Habsburgana Nederlando, Nederlandana Republiko, Bataviana Republiko, Rejio di Holando, e Nederlando.  Drenthe esas oficale provinco depos 1796.

La chefurbo e sideyo di la provincala guvernerio esas Assen.  La Laboro-Partiso (PvdA) esas la maxim granda partiso en la States-Provincial, dop qua esas la Volkspartij voor Vrijheid en Democratie (VVD) e Christen-Democratisch Appel (CDA).

Drenthe esas skarse habitata rural areo, nequale multa altra parti di Nederlando.  Ecepte ula industrio en Assen ed Emmen, la tero en Drenthe precipue uzesas por agrokultivo.

Nomo

La nomo Drenthe supozeble devenas de la Latina vorto por "tri" (Threant) de la Lex Salica, legolibro de qua anke la nomo di la regiono Twente (Tuihanti) devenas.  La nombro tri referas la tri dingspelen (distrikti) qui originale esis en Drenthe, malgre ke plu tarde esis sis.  La unesma savata uzo di Drenthe trovesas en atesto da Theodgrim, de la yaro 820.

Historio

Drenthe esas habitata depos prehistorio.  Restaji de la Pleistoceno (150.000 yari ante nun) esas inter le max anciena en Nederlando.  Fakte, ol esis un ek la maxim dense habitata arei di Nederlando til la Bronza Epoko.  la maxim palpebla evidentajo di to esas la dolmeni (hunebedden) konstruktita c. 3500 aK.   53 ek la 54 dolmeni en Nederlando esas trovebla en Drenthe, precipue en la nordesto dil provinco.

Drenthe unesme mencionesis en dokumento de 820, kom Pago Treanth (distrikto Drenthe).  En arkivi de Het Utrechts Archief, de 1024 til 1025, la "komtio Drenthe" mencionesas, kande Imperiestro Henrik II donis ol ad Episkopo Adalbold II di Utrecht.

Dolmeno o hunebed

Pos longa tempo sub la diocezo Utrecht, Episkopo Henrik di Wittelsbach en 1528 cedis Drenthe ad Imperistro Karolus V di Habsburg, qua inkluzis ol en Habsburgana Nederlando.  Kande la Republiko di la Sep Unionita Provinci deklaresis en 1581, Drenthe divenis parto di ol, ma ol nultempe ganis provincala rango pro lua povreso; la provinco esis tante povra ke ol ne mustis pagar federal imposti, e konseque ne reprezentesis en la States General.   La sucedinta Bataviana Republiko grantis ad ol provincala rango ye 1ma januaro 1796.

Kurte ante la komenco dil Duesma Mondo-Milito, la nederlandana guvernerio konstruktis kampeyo proxim la urbo Hooghalen por akomodar germana (juda) refujanti.  Dum la Duesma Mondo-Milito, la germana okupanti uzis la kampeyo (sub la nomo KZ Westerbork) kom Durchgangslager (transito-kampeyo).  Multa nederlandana judi, Sinti, cigani, rezisto-kombatanti e politikal opozanti enkarcerigesis, ante transferesar ad extermino-kampeyi en Germania e Polonia.   Anne Frank deportesis per la lasta treno qua livis la Westerbork-kampeyo ye 3ma septembro 1944.

Erikeyo en Drenthe

Geografio

Drenthe situesas en nordesta Nederlando; kun norde la provinco Groningen, weste la provinco Frizia, sude la provinco Overijssel, ed este la germana distrikti Emsland e Bentheim en la stato Niedersachsen.

Drenthe esas la 9ma maxim granda provinco di Nederlando.  Ol havas tota areo 2683 km², kun 2639 km² de tero 44 km² de aquo.  Cirkume 72% de la tero o 1898 km² uzesas por agrokultivo.

Drenthe havas plura erikeyi e nula signifikanta riveri o lagi. La nacionala parki Drents-Friese Wold e Dwingelderveld e la nacionala peizajo Drentsche Aa (parte) situesas en Drenthe.

La chefa urbana centri di la provinco esas la chefurbo Assen en la nordo ed Emmen, Meppel, Hoogeveen, e Coevorden en la sudo.

Historiala domo en Orvelte

Ekonomio

Agricultivo esas importanta employero, ma industrial arei esas trovebla proxim la urbi.  La quieteso dil provinco anke atraktas sempre plu multa turisti.

Drenthe konocesas kom la "Biciklago-Provinco" di Nederlando ed esas ecelanta loko por biciklo-vakanco, nam ol havas centi kilometri de biciklo-voyi tra foresto, erikeyo ed alonge kanali e multa urbi e vilaji alonge la voyo.  Drenthe exportacas ad omna parti di Nederlando ed anke recevas vari de Germania, do ol esas bona komerco-regiono.  Multa nederlandana e germana multanaciona kompanii havas kontori en Drenthe.

Kulturo

Peizajo en la Drentsche Aa

Plu kam duimo de la habitanti di Drenthe parolas la Drents-dialekto.  Singla urbo o vilajo havas sua propra versiono.  Omna versioni esas parto di la Basa Saxona linguo-grupo.

RTV Drenthe, la regionala radio- e televizion-kanalo, havas chefkontoro en Assen. La regionala diaia jurnalo por la provinci Drenthe e Groningen esas Dagblad van het Noorden, qua havas chefkontoro en la urbo Groningen.

Transporto

La autovoyi A28 (E232), A32, A37 (E233), e l'altra chefa stradi N33, N34, e N48 mantenesas da la stato.

Esas quar fervoyi parte en la provinco Drenthe:

• Arnhem–Leeuwarden: Overijssel – Meppel – Friesland
• Gronau–Coevorden: Germania – Coevorden
• Meppel–Groningen: Meppel – Hoogeveen – Beilen – Assen – Groningen
• Zwolle–Emmen: Overijssel – Coevorden – Dalen – Nieuw Amsterdam – Emmen Zuid – Emmen

Groningen-Aeroportuo Eelde esas mikra internaciona aeroportuo situita en Eelde en la provinco Drenthe.  Hoogeveen-Aeroportuo esas general aeroportuo situita en Hoogeveen.