Bauhaus

Staatliches Bauhaus, anke konocata kom Bauhaus, esis germana arto-skolo aktiva de 1919 til 1933, qua kombinis mestieri e bela arti, ed esis famoza pro la metodo di desegno quan ol publikigis e docis.

Bauhaus fondesis da Walter Gropius en Weimar.  La Germana termino Bauhaus - literale "konstrukto-domo"- komprenesis kom "Skolo di Konstrukto", ma malgre olua nomo e la fakto ke la fondinto esis arkitekto, Bauhaus unesme ne havis arkitekturo-fako.  Tamen, ol fondesis sur l'ideo di krear Gesamtkunstwerk ("totala arto-verko") en qua omna arti, inkluze arkitekturo, fine asemblesus.

La Bauhaus-stilo pose divenis un ek la maxim influiva flui en moderna desegno, modernista arkitekturo ed arto, desegno, ed arkitektural eduko.  La Bauhaus-movado profunde influis posa developi en arto, arkitekturo, grafika desegno, interna desegno, industriala desegno, e tipografo.

La skolo existis en tri germana urbi - Weimar, de 1919 til 1925; Dessau, de 1925 til 1932; e Berlin, de 1932 til 1933 - sub tri direktisti: Walter Gropius de 1919 to 1928; Hannes Meyer de 1928 to 1930; e Ludwig Mies van der Rohe de 1930 til 1933, kande la skolo klozesis da sua propra dukteri sub preso de la Nazi-rejimo, qua egardis ol kom centro di komunista intelektalismo.

Quankam la skolo klozesis, la stabo duris difuzar olua idealista precepti kande li livis Germania ed ekmigris ad omna parti dil mondo.

La chanji di loko e dukteraro rezultis en konstanta chanjado di foko, tekniko, instruktisti, e politiko. Exemple, la terakot-ateliero cesis kande la skolo translojis de Weimar a Dessau, malgre ke ol esabis importanta revenuo-fonto; kande Mies van der Rohe jereskis la skolo en 1930, ilu transformis ol aden privata skolo e ne permisis irga suporteri di Hannes Meyer asistar ol.