Arida klimato

Arida klimato o klimato di dezerto (BWh o Bwk, segun la klimatala klasifikuro da Köppen) esas klimato ube la pluvo-quanto esas skarsa - dum kelka yari, mem povas pluvar nulo - e la vejetantaro esas nula o poka (ordinare konsistanta ek planteti o kaktusi).

Regioni kun arida klimati:

██ BWh

██ BWk

Regioni qui omnayare recevas min kam 200 mm di pluvo-quanto judikesas kom dezerti. La pluvo-quanto en la maxim multa dezerti varias de 25 mm til 200 mm omnayare. Dum kelka yari en kelka dezerti, la pluvo-quanto povas esar preske nula, o mem nula. Exemple, la staciono meteorologiala de la Morto-valo en Usa enrejistris nur 16 mm di pluvi de 1931 til 1934. Kelka loki, exemple Tucson, Arizona, recevas plu kam 250 mm omnayare, ma anke judikesas kom dezerti, pro la intensa vaporigo. Ordinare, la maxim multa dezerti situesas en amba misferi inter latitudi 15° e 35°.

Sablo-duno che dezerto Kyzyl Kum.

Existas kold arida klimato e varm arida klimato (videz mapo). Varma dezerti existas en subtropikala regioni qui recevas intensa sunala lumo dum multa dii dil yaro, pro sikanta aero ed alta preso, exemple Sahara, Kalahari, o granda parto di Iran. Kolda dezerti existas en temperema regioni dop alta montari qui recevas preske nula humideso, kompare l'altra latero, exemple Gobi, Atakama, Kizil Kum (inter Uzbekistan e Kazakstan) e Taklamakan.

Por diferar "varma dezerti" de "kolda dezerti", on povas uzar tri izotermi: mezavalora temperaturo yarala egala a 18°C, o mezvalora temperaturi di 0°C o di -3°C dum la maxim kolda monato. Do, irga qua izotermo uzesas, ula dezerto kun mezavalora temperaturi plu granda kam la izotermo judikesas kom "varma dezerto", kontre ke dezerti kun mezvalora temperaturi infre la izotermo judikesas kom "kolda dezerto".

Agrokultivo nur esas posibla en regioni ube existas irigaco, exemple en la dezerto Negev en Israel, od en la valo di Nilo, od ube existas oazisi.

Malgre ke Antarktika havas la maxim vasta sika regiono del mondo, lua klimato ne nominesas arida, vice polala klimato.