Tirano (Italia)
Tirano esas urbo en Valtellina, situita en la provinco Sondrio en norda Italia. Ol havas 9.130 habitanti (2015) ed adjacas la suisa-italiana frontiero. La rivero Adda trafluas la urbo.
Tirano havas du fervoyo-stacioni. Un, normala-larjesa, jeresas da Trenitalia, la statala fervoyo-kompanio, ed esas la termino di la Tirano–Lecco-fervoyo.
La altra, metro-larjesa, jeresas da la Retia fervoyo (RhB). La voyo di la Bernina-fervoyo konektas St. Moritz (kantono Graubünden, Suisia) kun Tirano. La kompleta lineo apertesis en 1910. En 2008 la Bernina-fervoyo e la Albula-fervoyo registragesis da UNESCO en la listo di UNESCO Mondala Heredajo-Situi.
Situita proxime esas la katolika templo di la Madonna di Tirano, granda turist-atraktivo. La templo dedikesas al aparo di la Beata Matro a Mario Degli Omodei ye septembro 29ma, 1504, evento quo, segun la kredo di religioza pilgrimeri, finis pesto.
La Palazzo Salis proxim la municipala kontori esas remarkinda exemplo dil uzo di trompe l'oeil por krear la iluziono di arkitekturala traiti.
Malgre sua habitantaro di min kam 10.000, Tirano egardesas kom urbego pro la muri qui konstruktesis por protektar ol.