Stadtbahn di Köln

La Stadtbahn di Köln esas lejera fervoyo en la germana urbo Köln, inkluzante plura cirkondanta urbi di la regiono Köln-Bonn (Bergisch Gladbach, Bonn, Bornheim, Brühl, Frechen, Hürth, Leverkusen-Schlebusch, e Wesseling).

Stadtbahn-treno apud la fluvio Rheno

La termino Stadtbahn signifikas sistemo qua kontenas elementi de tramvoyi ultre subtera fervoyo-reto (U-Bahn) ed interurba fervoyo, mem inkluzante tri linei di "pezoza" fervoyo uzata da varo-treni ultre Stadtbahn-vehili.  Du ek ica linei konektas la Stadtbahn di Köln kun la Stadtbahn di Bonn.  Ica linei (16 e 18) kunjeresas da amba urbi, e kelkafoye referesas kom Stadtbahn Rhein-Sieg. La Stadtbahn di Köln jeresas da la Kölner Verkehrsbetriebe (KVB) e la Stadtbahn di Bonn da la Stadtwerke Bonn (SWB).  La KVB e SWB esas membri dil Verkehrsverbund Rhein-Sieg, formacita en 1987 por unionar la transit-autoritati en la Köln-regiono e havar sama preco-strukturo.  Esas 38 subtera stacioni, kun quar nun konstruktata.

Treno che la staciono Deutzer Freiheit

Entote la Stadtbahn di Köln havas reto di longeso 194,8 kilometri.  Ek to jacas 28 kilometri en tuneli e kin kilometri esas elevita fervoyo.  La konekti, anke subtere, esas generale samnivela.  Ultre signalizo, blok-signalizo aplikesas ye omna subtera voyi e ye multa altra loki.  Sur strado-nivela voyi la tramreli tote separesas del trafiko ecepte che krucovoyi.  La nombro de en-strada voyi esas limitizita.