Ponto Rialto
La Ponto Rialto (Italiana: Ponte di Rialto; Veneziana: Ponte de Rialto) esas la maxim anciena de la quar ponti trans la Granda Kanalo en Venezia, Italia.
Ol konektas la sestieri (distrikti) San Marco e San Polo, e rikonstruktesis plurafoye depos sua unesma konstrukteso kom pontono-ponto en la 12ma yarcento, ed esas nun signifikanta turist-atraktivo en la urbo.
L'unesma sika transireyo di la Granda Kanalo esis pontono-ponto konstruktita en 1181 da Nicolò Barattieri. Ol nomizesis la Ponte della Moneta, supozeble pro la monetifeyo qua stacis proxim olua estala enireyo.
La developeso ed importo dil Rialto-merkato an la estala rivo augmentis trafiko sur la flotacanta ponto, do ol remplasesis en 1255 per ligna ponto. Ta strukturo havis du inclinita rampi qui interrenkontris ye movebla centrala parto, qua povis levesar por permisar paso da alta navi. La konekto kun la merkato fine duktis a nomo-chanjo por la ponto. Dum la unesma duimo del 15ma yarcento, du rangi de butiki konstruktesis alonge la ponto. La renti adportis revenuo a la Stato-Fisko, to quo helpis mantenar la ponto.
Manteno esis importantega por la ligna ponto. Ol parte brulesis dum la revolto duktita da Bajamonte Tiepolo en 1310. En 1444, ol krulis sub la pezo di turbo qua spektis batelo-parado ed ol krulis itere en 1524.
L'ideo pri rikonstruktar la ponto per petro unesme propozesis en 1503. Plura projeti konsideresis dum la sequinta yardeki. En 1551, l'autoritati demandis propozi por rinovigo dil Ponto Rialto. Projeti ofresis da famoza arkitekti, quala Jacopo Sansovino, Palladio e Vignola, ma omna inkluzis klasika desegno kun plura arki, qua judikesis kom neapta. Michelangelo anke konsideresis kom desegnero dil ponto.
La prezenta petra ponto, desegnita da Antonio da Ponte, fine kompletigesis en 1591. Ol similesas la ligna ponto quan ol sucedis. Du inklinita rampi duktas a centrala portiko. Ambalatete de la portiko, sur la kovrita rampi esas rangi de butiki. L'injenior-arto dil ponto egardesis kom tante audacoza, ke l'arkitekto Vincenzo Scamozzi predicis futura ruineso. La ponto defiis sua kritikeri e divenis un ek l'arkitektural ikoni di Venezia. Nunadie, la Ponto RIalto esas un ek la maxim populara turismo-atraktvi en Venezia.