Southern Poverty Law Center

La Southern Poverty Law Center (SPLC) esas usana senprofita legala interceso-organizuro di qua la specalismo esas litijo relate civila yuri e la publika interesto.

Simbolo dil SPLC

Kun chefkontoro en Montgomery, Alabama, ol konocesas pro sua legala kazi kontre blanka suprista grupi, klasifiko di odio-grupi ed altra extremista organizuri, e pro avancigar programi di toleremeso-eduko.

La SPLC fondesis da Morris Dees, Joseph J. Levin Jr., e Julian Bond en 1971 kom lego-firmo pri civila yuri en Montgomery, Alabama.  Bond servis kom prezidanto dil komitato inter 1971 e 1979.

En 1979, la SPLC komencis litijo-strategio di civila procesi por monetala indemno vice la viktimi di violento dal Ku Klux Klan ed altra blanka suprista grupi, kun omna imdemno donita al viktimi o donacita ad altra organizuri.  La SPLC anke okupas su pri altra questioni di civila yuri, inkluze kazi por defiar institucala rasala segregaco e diskriminaco, nehumana e nekonstitucala standi en karceri e diteno-centri, diskriminaco surbaze sexuala orientizo, mistrakto di nelegala enmigranti, e nekonstitucala mixo di eklezio e stato.  La SPLC provizis informo pri odio-grupi a la Federal Bureau of Investigation (FBI) ed altra agenterii polical.

Chefkontoro dil SPLC

Depos la 2000a yari, lua klasifiko e listizo di odio-grupi (organizuri qui segun ol od "atakas o difamas tota klaso de homi, ofte pro lia nechanjebla traiti") ed extremisti ofte deskriptesis kom autoritatoza ed aceptes e citesas en edukala e jurnalala artikli pri tala grupi e relatanta questioni.  La listizi dal SPLC anke kritikesis da altri, qui argumentas ke ula listizi esas tro larja, politikale motivizita, o nejustifikita.  Esis anke akuzi di misuzo o nenecese extravaganta uzo di pekunio dal organizuro; pro to ula employati nomizas la chefkontoro la "Povreso-Palaco".

En 2019, la fondinto Morris Dees desengajesis, e sequis la demisiono dal prezidanto Richard Cohen.  Extera konsultanto, Tina Tchen, engajesis por revuar laborala praktiki, aparte relate akuzi di rasala e sexuala persekuto.

HistorioRedaktar

La SPLC fondesis en 1971 kom lego-firmo qua originale enfokigis questioni quala luktar kontre povreso, rasala diskriminaco e la morto-puniso en Usa.  Dees pregis la civila-yuri-duktero Julian Bond servar kom prezidanto, esence honorumala ofico; il demisionis en 1979 ma restis en la direktistaro til sua morto en 2015.  En 1979, Dees e la SPLC komencis civila procesi kontre la Ku Klux Klan e simila organizuri por monetal indemno vice lia viktimi.  La favoroza verdikti di ta procesi bankrotigis la KKK ed altra vizita organizuri.  En 1981, la Centro komencis sua Klanwatch-projeto por kontrolar l'aktiviesi dal KKK.  Ta projeto, nun nomizita Hatewatch, pose expansesis por inkluzar sep altra tipi de odio-organizuri.

En 1986, la tota legala stabo dil SPLC, exkluze Dees, demisionis pos ke l'organizuro movis de tradicionala laboro pri civila yuri vers luktar kontre dextrana extremismo.  En 1995, la jurnalo Montgomery Advertiser ganis Pulitzer-Premio pro laboro qua sondis jerala su-interesto, questioninda praktiki, ed alegi di rasala diskriminaco da employati dil SPLC.  La projeto "Teaching Tolerance" iniciesis en 1991, ed en 2013 citesis kom "un ek la maxim multe lektata jurnali konsakrita a diverseso e sociala yusteso en eduko".