Sligo
Sligo (pr. c. slaigou, irlandana: Sligeach, "abundanta de konki") esas marbordala portuo e la chefurbo di Komtio Sligo, Republiko Irlando, en la westala provinco Connacht.
Kun habitantaro c. 20.000 en 2014, ol esas la duesma maxim granda urbala centro en westala Irlando, nur Galway esas plu granda. La distrikto Sligo havas 61% (38.581) del komtio-habitantaro (63.000).
Sligo esas historiala, kulturala, komercala, industriala, endetala e servala centro di regional importo en westala Irlando. Servata da fervoyo, portuo e stradi, Sligo signifikante influas sua regiono. Sligo esas anke populara turisto-destino, situita en areo di naturala belegeso, kun multa literatural e kultural asocii.
Nomo redaktar
Sligo esas angligo dil irlandana nomo Sligeach, "abundanta de konki" o "konkoza loko". Ol referas abundo de konki trovebla en la rivero ed estuario, ed de la granda konk-amasi en la areo. La rivero nun konocata kom la Garavogue (irlandana: An Gharbhóg) "aspereto" originale nomizesis Sligeach.
Historio redaktar
La importo di la situeso di Sligo en prehistorio demonstresas dal abundo di anciena situi proxima e mem en la urbo. Exemple, la unesma rondvoyo en Sligo konstruktesis cirkum megalitala tombo che Abbeyquarter North en Garavogue Villas. Ico esas membro di grupo de monumenti en Carrowmore sur la Cuil Irra-peninsulo en la westala parto dil urbo. La areo cirkum Sligo havas un ek la max alta densesi de prehistoria situi en Irlando. Ol esas la unika loko ube omna klasi de irlandana megalitala monumenti trovesas samaloke. Monto Knocknarea, kun la tumulego Miosgan Maeve, dominacas la cielo en la westo dil urbo. Cairns Hill an la suda bordo dil urbo anke havas du grandega petra tumuli.
Sligo-bayo esas anciena naturala portuo, konocita da greka, feniciana e Romana komerceri. Dum la frua mezepoko la situo di Sligo eklipsesis dal importo dil granda Kolumbana monakerio 5 milii norde ye Drumcliff. En la 12ma yarcento esis ponto e mikra habiteyo ye la situo dil nuna urbo. La Normanda kavaliero Maurice Fitzgerald establisis la mezepokala europan-stila urbo e portuo Sligo, konstruktinta Sligo-kastelo en 1245. On referas ica Sligo kom sraidbhaile ('strado-habiteyo') qua konsistis ek kastelo e fortifikuri. Dominikana monakerio (Blackfriars) anke fondesis da Maurice Fitzgerald e la Rejo di Connacht Felim mac Cathal Crobderg Ua Conchobair en 1253. Ico acidente destruktesis da fairo en 1414, e pose rikonstruktesis. Normanda hegemonio, tamen, ne duris longe en Sligo.
L'urbo esas la unika Normanda-fondita urbo en Irlando preske kontinue regnita da irlandani tra la Mezepoko.
Pro konkurenco inter klani pri la profitoza portuo-imposti di Sligo, la urbo brulesis, spoliesis od asiejesis c. 49-foye dum la mezepoko, tamen ta inkursi semble poke efektigis la developo dil urbo nam en la meza 15ma yarcento la urbo e portuo divenis plu importanta. Ol komercis kun Galway, Bristol, Francia e Hispania. Inter la frua prezervita specimeni di skribita angla en Connacht esas konto di 20 marki, datizita agosto 1430, pagita da Saunder Lynche e Davy Botyller, a Henry Blake e Walter Blake, klienti di "ye King and John Rede, controller of ye porte of Galvy and of Slego".
Sligo duris sub irlandana regno til la tarda 16ma yarcento kande, dum la Elizabethana konquesto, Sligo selektesis kom chefurbo di la nova Komtio Sligo.
La urbo sufregis pro kolero-epidemio en 1832. On spekulas ke Bram Stoker, di qua la matro Charlotte Blake Thornley probable naskis en Sligo en 1818 ed experiencis la epidemio, influesis da elua rakonti kande il skribis sua famoza romano, Dracula. La familio lojis en Correction Street en la urbo.
La Granda Famino inter 1847 e 1851 ekmigrigis 30.000 homi tra la portuo di Sligo. An la Kayi, an la rivero Garavogue, esas bronza memorialo al enmigrinti. Ico esas un ek serio de tri skulturi komisita da la Sligo Famine Commemoration Committee por honorizar la viktimi di la Granda Famino.
Geografio redaktar
Situita sur litorala planajo an la Atlantika Oceano, Sligo situesas sur basa gravio-kolini an la rivi dil rivero Garavogue, inter Lough Gill e la estuario vers Sligo-Bayo. L'urbo cirkondesas da multa monti, kun la kresti Slieve Daeane e Monto Killery sudeste, Monti Cope e Keelogyboy nordeste, e la distinta monti di Knocknarea weste e Benbulben norde.
Sligo esas importanta ponteyo en la chefa norda-suda voyo inter Ulster e Connacht. Ol esas la chefurbo di Komtio Sligo ed esas en la Baronio di Carbury (olim la irlandana tuath di Cairbre Drom Cliabh).
Kulturo redaktar
Muziko esas tre importanta en Sligo, e multa muzikisti de Sligo e cirkum la mondo venas a Sligo por plear.
La kulturo di Sligo inspiris la poeto W. B. Yeats e lua fratulo la artisto Jack Butler Yeats. Granda kolekturo di arto da Jack B Yeats esas che la Model Niland-Galerio.
Yeats-Somero Skolo eventas omnayare en la urbo ed atraktas studenti de cirkum la mondo, notinde Japonia.
Sligo recente saliigis sua konekti kun la Goon Show-stelo e skribisto Spike Milligan, di qua la patro esis de Sligo, per prizentar plako che la olima familio-hemo di le Milligan ye Numero 5 Holborn Street.
La pop-bando Westlife formacesis en 1998 en Sligo.
Sligo havas longa historio ed internaciona reputeso pro irlandana muziko, e sesioni eventas reguloze en plura loki. Komtio Sligo havas sua propra unika stilo ed esas mondo-famoza pro la qualeso di sua tradicionala muzikisti. Multa homi venas de cirkum la mondo por lernar Irlandana tradicionala muziko en Sligo.
Sligo gastigas multa festivali tra la yaro inkluzanta Sligo Live omna-oktobro, The Sligo Summer Festival qua celebris la 400ma aniversario di Sligo, e The Fleadh Cheoil qua eventis en tri intersequanta yari (1989, 1990 e 1991) ed itere en 2014 e 2015.
Sligo Jazz Project eventas omna-julie ed esas tre populara.
Transporto redaktar
Sligo dum la nokto La chefa stradi a Sligo esas la N4 a Dublin, la N17 a Galway, la N15 to Lifford, Komtio Donegal; e la N16 a Blacklion, Komtio Cavan.
Sligo aquiris fervoyo a Dublin ye 3ma decembro 1862, per l'aperto di Staciono Sligo. Konekti ad Enniskillen e la nordo sequis en 1881 e Limerick e la sudo in 1895. La lineo ad Enniskillen klozesis en 1957 e pasajero-servi a Galway-Ennis-Limerick klozesis en 1963.
Sligo e Komtio Sligo servesas da Sligo-Aeroportuo, 8 km de Sligo proxim Strandhill, ma nula reguloza flugi nun operacas ek la aeroportuo. La maxim proxima aeroportuo kun reguloza flugi esas Ireland West Airport Knock proxim Charlestown, Komtio Mayo, 55 km fore.
Bus Éireann operacas quar autobus-voyi en la urbo: una servas the urbo-centro e l'altra la westo dil urbo. L'altra du voyi vehas del urbo a Strandhill e Rosses Point rispektive. Bus Éireann anke provizas inter-urba servi ad: Enniskillen, per Manorhamilton; a Derry; a Galway, per Ireland West Airport Knock; ed a Dublin, per Dublin-Aeroportuo ed urbi alonge la strado N4.
Bus Feda operacas voyo de Gweedore, Komtio Donegal per Sligo a Galway.
Portuo redaktar
Sligo esas un ek nur du operacanta portui an la nordwesta marbordo di Irlando inter Galway e Derry, la altra esas Killybegs. Nuntempe, la portuo povas akomodar navi kun aquo-profundeso 5,2 metri e longeso 100 metri. La Portuo di Sligo extensesas de la Timber Jetty til Hyde Road Bridge tra disto de 1,3 km.
La portuo nun traktas kargaji de karbono, ligno, fisho e metalo, e c. 25 navi singlayare endokeskas en la portuo.
Nula pesko-navi operacas ek la Portuo di Sligo.