Shablono:Eventi/6 di decembro

Venuso

• 1631. La astronomo Johannes Kepler, utiligante observadi di planetala movadi e facante kalkuladi, predicis ke Venuso transverse pasus la suno ye ca dio en 1631; lo esis la unesma tala predico. Kepler mortis un yaro ante ca evento; Franca ciencisto Pierre Gassendi serchis la predicata paso, tamen ol ja finabis ante sunlevo en Paris. Gassendi ed altri sucesoze observis altra predico di Kepler, ke Merkuro transverse pasus la suno ye 7 di novembro 1631.

• 1841. En la Gewandhaus di Leipzig, la Simfonio no. 4, da Robert Schumann, esis unesmafoye pleata, direktata da Ferdinand David. Ca numero esis plu tarde donata a la simfonio; Schumann kompozis ol kurte pos la sucesoza unesma pleado di Simfonio no. 1, ed ol esis kompleta por prizenteso a lua spozino Clara ye 13 di septembro 1841 kom naskodio-donacajo. Pos la pleado, il esis ne kontenta pri la nova simfonio, ed il plu tarde ri-instrumentizis ol. La nova versiono, dedikita a la violinisto Joseph Joachim, esis unesmafoye pleata ye 3 di marto 1853 en Düsseldorf.

• 1965. Luna 8, kosmosondilo di USSR, kolizionis kun la luno. Ol lansesis ye 3 di decembro; la intenco esis dolce atingar la surfaco di la luno. La voyajo a la luno esis sucesoza; tamen, dum la proximesko a la surfaco, la retro-kombustado ne funcionis, ed ol kolizionis ye cirkume latitudo 10 gradi N e longitudo 63 gradi W. En februaro 1966, Luna 9 sucesoze atingis la surfaco di la luno e prenis fotografuri.