Shablono:Eventi/22 di novembro

John F. Kennedy

• 1928. En Paris, la orkestrala verko Boléro, da Maurice Ravel, esis unesmafoye pleata, kun granda suceso. La verko kreesis pro komiso de la dansisto Ida Rubinstein, ed ol unesmafoye esis pleata kom baleto. Ravel havis la ideo di insistema melodio, en la stilo di Hispana danso la bolero, qua esus iterata sen developo, dum ke la orkestro gradope augmentesis. Il esis surprizata pro la suceso di la verko, quan il deskriptis kom "orkestrala tisuo sen muziko", ed il supozis ke orkestri refuzus plear ol; ol nuntempe esas ilua maxim bone konocata verko.

• 1963. John F. Kennedy, prezidanto di Usa, ocidesis dum ke il iris en veturo-procesiono en Dallas, Texas. Pafadi venis de la sisesma etajo di strukturo an Elm Street, tra qua la procesiono pasis. Esis deklarata mi-horo plu tarde ke Kennedy, pafita en la kapo, esas mortinta. La asasininto, Lee Harvey Oswald, arestesis balde pos la evento. Oswald esis ocidata du dii plu tarde, dum transfero de polico-staciono a karcero, da amuzeyo-proprietero Jack Ruby.

• 1977. Reguloza flugi di la aeroplano Concorde komencis a John F. Kennedy-aeroportuo, ye New York en Usa. Concorde, la pasajero-aeroplano qua flugis plu rapide kam sono, unesmafoye flugis reguloze ye 21 januaro 1976, de London a Bahrain e de Paris a Rio de Janeiro. Flugi di Concorde super Usa esis komence interdiktata pro la granda sono efektigata; ca interdikto esis pose revokata por Dulles-aeroportuo ye Washington DC, e plu tarde por JFK-aeroportuo.