Shablono:Eventi/16 di januaro

• 1605. En Hispania, la unesma parto di la romano Don Quijote, da Miguel de Cervantes, unesmafoye aparis. 400 kopiuri esis imprimata, de qui la plu multa sendesis ad Amerika. La libro esis sucesoza, e plusa imprimaji di la libro aparis en Hispania e Portugal. La duesma parto di la romano aparis en 1615, ed en 1617 la du parti imprimesis en un tomo. Don Quijote havis granda influo por sequanta literaturo.

• 1891. En Paris, la kompozisto Léo Delibes mortis. Il esas famoza pro ilua baleti ed operi. Il naskis en Saint-Germain-du-Val en 1836, e studiis ye la Konservatorio di Paris de 1847; pos diversa kompozuri por teatro, ilua unesma notenda verko esis la baleto Coppélia, di 1870. Ilua baleto Sylvia aparis en 1875. Il kompozis multa operi, di diversa stili; la maxim notenda esas Lakmé di 1883, fondita sur romano da Pierre Loti.

• 1919. En Usa, la 18ma emendo di la konstitucuro, pri la interdikto di alkaholajo, propozita da la Senato en 1917, esis aprobata da 36ma stato; do ol esis ratifikata, e la interdikto esis efektigata de 17 di januaro 1920. To sequis multa debato dum antea yardeki pri ca temo. Pos nacionala interdikto, la quanteso di alkoholajo drinkata diminutis; tamen kriminala organizuri aparis por la distributo e vendo di alkoholajo, e publika susteno di interdikto diminutis. La 21ma emendo, qua revokis la 18ma emendo, esis ratifikata ye 5 di decembro 1933.