Salsa
Salsa esas populara jenro di danso-muziko qua komence originis en New-York dum la yari 1960a, kun multa elementi de Kubana muzikala jenri, inkluzite son, montuno, guaracha, cha cha cha, mambo, e Portorikana plena e bomba. Latin-Amerikana jazo ank influis salsa-aranjisti, pianisti e solisti. Komence la nomo Salsa uzesis komercale por diversa stili di Latin-Amerikana muziki, ma nun ol konsideresas specifika muzikala stilo.
La precipua origino di salsa esas Kubana jenro son, qua su ipsa rezultis de la mixo inter Hispana canción (kantado) ed Afrikana-Kubana perkuto-muziko, kelkafoye kun elementi de jazo, bomba e plena.[1] Multa muzikologiisti trovis elementi di salsa en jenro konocita kom Son Montuno, pleita da Arsenio Rodríguez, sua orkestro Conjunto Chappottín, e Roberto Faz. Altralatere, mambo, qua esas diferanta stilo, developesis da Israel López Valdés, konocata kom "Cachao", Beny Moré e Dámaso Pérez Prado. Moré e Prado iris rezidar en México, ube ca muzikala stilo pleesis da granda orkestri kun suflo-instrumenti.[2] Muzikologiisto Ed Morales emfazas ke l'interago inter Afro-Kubana muziko e jazo en New-York ank esis importanta por l'evoluciono di amba jenri.
Komence, la maxim multa salsa-bandi konsistis ek Kubani e Portorikani, ma balde ca jenro dissemesis tra altra Amerikana landi. Exempli pri pioniri di salsa esis Johnny Pacheco, Celia Cruz, Rubén Blades, Richie Ray, Bobby Cruz, Ray Barretto, Willie Colón, Larry Harlow, Roberto Roena, Bobby Valentín, Eddie Palmieri e Héctor Lavoe.[3]
Salsa esas Hispana vorto signifikanta "sauco", e relatas l'ideo di "spicizo" de Karibiana koquarto. Dum la 20ma yarcento, ca vorto aquiris senco muzikala ambe en l'Angla ed en la Hispana. En 1973, televiziono-prizentistino Izzy Sanabria uzis la vorto salsa unesmafoye por referar la muzikala stilo de la bando Conjunto Los Salseros, kreita da Kubana kantisto e kompozisto Cheo Marquetti. Antee, ca vorto ja uzabis, tamen por referar diferanta muzikala stili, inkluzinte la muziko de Mexikiana mariachi.
Referi
redaktar.jpg)
- ↑ Morales, Ed:The Latin Beat: Rhythms and Roots of Latin Music from Bossa Nova to Salsa and Beyond Publikigita da Da Capo Press. Dato di publikigo: 2003.
- ↑ Díaz Ayala, Cristóbal: Música cubana, del Areyto a la Nueva Trova, Ediciones Universal, Miami Florida, 1993. p. 194.
- ↑ Unterberger, Richie:Music USA Publikigita da The Rough Guide. Dato di publikigo: 1999.