Roy Ayers

Roy Ayers (Los Angeles, 10ma septembro 1940) esas usana "funk"-, "soul"- e jaz-*vibrafonisto. Kande il evis kin yari il recevis sua unesma vibrafon-marteli de Lionel Hampton, pos quo il komencis plear la vibrafono.

Dum yardeki Ayers konocesas kom pioniro e fondinto di diversa flui di jazo. Dum la 1960a yari il laboris precipue pri tradicionala jazo e kunlaboris inter altri kun Herbie Mann, Curtis Amy e Chico Hamilton. Dum la 1970a e 80a yari il enfokigis kombino di "rhythm and blues" kun jazo e "funk". Dum la sequanta yari il itere chanjis direciono ed atingis la rango di Baptopatro di "Acid Jazz" pro la granda rolo quan il pleis en la developo di ta jenro ed olua senprecedenta populareso en Anglia.

Un ek la maxim bone konocata kansoni da Ayers esas Everybody Loves the Sunshine; multa "hiphop"-artisti riuzis ("sampled") ta kansono en sua muziko. Anke la kovrilo dil albumo We Live In Brooklyn inspiris tota "hiphop"-generaciono (exemple N.W.A.).

Ultre sua solo-albumi (ek qui kelka sucesis per influeso da diversa muzikojenri) Ayers dum la 1980a yari fondis sua propra diskokompanio Uno Melodic Records, skribis e produktis albumi por diversa artisti, e kunlaboris kun Fela Kuti de Nigeria. Ayers laboris depos la 1990a yari anke plurafoye kun produktisti di "house"-muziko. Il anke pleis ye la albumo Nuyorican Soul (1997) da Masters at Work. Plu tarde il laboris plurafoye kun Kerri Chandler e Dennis Ferrer. Nun evanta plu kam 65 yari Ayers ankore *turas, ed en 2004 editis la disko Mahogany Vibe.