Revoluciono Egiptiana di 2011

La revoluciono Egiptiana di 2011, anke konocata kom revoluciono di la 25ma di januaro (Arabe: ثورة ٢٥ يناير; Thawrat khamsa wa-ʿišrūn yanāyir) komencis ye la 25ma di januaro 2011 en Kairo e dissemis tra tota Egiptia. La dato selektesis por koincidar kun la "dio di la Polico" en la lando, kom deklaro kontre la kreskanta brutaleso di Egiptiana policistaro dum la lasta yari di la guvernerio di Hosni Mubarak. Ol konsistis ek demonstri, striki, okupo di placi, neviolentoza civila rezisto e marchi. Milioni di personi demandis la revoko di Mubarak. Violentoza konflikti inter protesteri e la policistaro rezultis adminime 846 morti e plu kam 6 mil plusa homi vundita. Protesteri reaktis e brulis plu kam 90 policeyi en tota lando.

Placo Tahir, ye la 4ma di februaro 2011.

Incendio che sideyo dil Nacionala Demokrata Partiso, di Hosni Mubarak, ye la 29ma di januaro.

L'emfazo di la plendaji di la protesteri esis legala e politikala temi, exemple la violento di la policistaro, legi publikigita dum l'urjanteso-standi, demandi pri politikala e civila libereso, protesto kontre la kreskanta inflaciono, basa salarii e la korupto. La protesteri demandis la renunco di Mubarak. Sindikati di laboristi anke partoprenis la protesti. Dum la revolto, Kairo deskriptesis kom "milito-zono", ed en la portuala urbo Suez ofte eventis violentoza konflikti.

Ye la 11ma di februaro Mubarak demisionis pro la protesti determinita, e transferis la povo a la Supra Konsilistaro dil Armei. Ye la 13ma di februaro, la Supra Konsilistaro dil Armei suspensis la konstituco, revokis la du chambri dil Parlamento, e la lasta chefministro di Mubarak, Ahmed Shafik, divenis "guverno-sorgisto" til la formaco di nova guvernerio. En junio 2012, partiso Mohamedana Frateso vinkis prezidantal elekto e Mohamed Morsi asumis la prezidanteso ye la 30ma di junio.